काठमाण्डौ , १० पुस ।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पर्साको ठोरी गाँउपालिकालाई प्रदेश नं. ३ मा गाभिने बताउनुभएको छ ।
ठोरी गाँउपालिकाले आज आयोजना गरेको स्वागत तथा सम्मान कार्यक्रममा प्रचण्डले नयाँ बन्ने सरकारको पहिलो प्रथामिकतामा ठोरी रहने बताउनुभयो । उहाँले ठोरीलाई पहिले नै प्रदेश ३ मा गाभ्ने सहमति भएपनि मधेश आन्दोलनका कारण रोकिएको वताउनुभयो ।
ठोरीका जनताले पटक पटक प्रचण्डसहित विभिन्न दलका नेताहरुलाई भेटी ठोरीलाई ३ नम्बर प्रदेशमा राख्न माग राख्दै आएका थिए।
ठोरी गाँउपालिकाले सर्वसम्मत निर्णय गरेर प्रदेश ३ मा गाभिने बताएकाले कार्यान्वयनका लागि सहज भएको प्रचण्डको भनाई छ।
प्रचण्डले ठोरी केरुङ मार्ग छिट्टै निर्माण गरिने वताउनुभयो । उहाँले भन्नुभयो , ‘ त्रिदेशीय साझेदारीका लागि यो मार्ग निकै महत्वपूर्ण छ,यो निकै छोटो र उत्कृष्ट मार्ग बन्ने छ।’
चुनावको विजय जुलुसका लागि केपी ओली रसुवा जाने र आफू चितवन आउने संयोगगले ठोरी–केरुङ राजमार्ग बन्ने निश्चित भएको प्रचण्डको दावी छ । उहाँले ठोरी नाकालाई थप व्यवस्थित गर्नेसमेत प्रतिवद्धता जनाउनु भयो ।
