काठमाडाैं ,९ पुस । अघिल्लो साता निरन्तर घटेको शेयर बजार यो साताको पहिलो दिन आइतबार पनि तल झर्यो । नेप्से परिसुचक ४.६ अंकले घटेर १४६७.५५ मा रोकिएको छ ।
आइतबार बजार खुलेपछि शुरुवातमा उकालो लागेको बजार दिउंसोबाट ओरालो झर्न थालेको थियो । बजार बन्द हुंदासम्म परिसुचक ०.३१ प्रतिशतले घटेको नेपाल स्टक एक्स्चेन्जले जनाएको छ । आइतबार वित्तबाहेक सबै कम्पनी समुहको सूचक घटेको छ । सबैभन्दा बढी विमा समुहको सूचक ३६.७८ अंकले घटेको छ ।
निर्वाचनपछि शेयर बजार बढने अपेक्षा गरिएपनि त्यसो हुन नसकेपछि लगानीकर्ता निरास बनेका छन । निर्वाचनपछि स्थायी सरकार बन्ने अपेक्षा गरिएपनि राजनीतिक अन्यौल बढेपछि त्यसको प्रत्यक्ष प्रभाव शेयर बजारमा परेको हो ।
आर्थीक उदारिकरणको वकालत गर्ने नेपाली कांग्रेस पराजित भएको तथा वाम गठबन्धनको सरकार कहिले बन्ने अन्यौल देखिएकाले शेयर बजारमा असर परेको त्यससंग सम्बन्धित विष्लेषकको भनाई छ । नयाँ सरकार बनाउन दलहरुबीच सघन छलफल समेत नभएपछि लगानीकर्ता आस्वस्त हुन सकेका छैनन ।
वाम गठबन्धनले स्थित सरकार बनाउने विश्वास सृजना नभएसम्म बजारमा सुधार हुने संभावना कम हुने शेयर विष्लेषक बताउंछन । नयाँ सरकार बन्न अझै केही समय लाग्ने देखिएकाले शेयर तल झर्ने क्रम अझै केही दिन जारी रहनसक्ने उनिहरुको भनाई छ ।
