काठमाडौं, ८ पौष ।
नेपाल विद्युत प्राधिकरणले बिहान र बेलुकीको समयमा सकेसम्म बढी विद्युत खपत हुने उपकरण प्रयोग नगर्न आग्रह गरेको छ ।
नदीहरुमा पानीको बहाव कम भइ विद्युत उत्पादनमा कमी आएकाले बिहान र बेलुकाको समयमा बिजुली खपत गर्दा ध्यान दिन प्राधिकरणले आग्रह गरेको हो ।
विद्युतको उच्च माग हुने बिहान ६ देखि ९ बजेसम्म तथा बेलुका ५ देखि ९ बजेसम्म विद्युत उच्च खपत हुने उपकरण नचलाउन आग्रह गरिएको छ ।
प्राधिकरणले सार्वजनिक सूचना जारी गर्दै हिटर, ओभन, राईसकुकर, आइरन, एयर कण्डिस्नर, पम्प जस्ता बढी विद्युत खपत हुने मेसिन उक्त समयमा प्रयोग नगर्न आग्रह गरेको हो ।
उत्पादन नबढेको तर ग्राहकको माग भने बढेको जानकारी दिंदै प्राधिकरणले विजुली व्यवस्थापन गर्न प्रयासरत रहेको पनि बताएको छ ।
यसैबीच , नेपाल विद्युत् प्राधिकरण वितरण केन्द्र लहानले लामो समयदेखि विद्युत् महशुल नबुझाउने सेवाग्राहीको विद्युत् लाइन काट्न शुरु गरेको छ ।
प्राधिकरण वितरण केन्द्र लहानले रु ५० हजारभन्दा बढी बक्यौता रहेका २२० ग्राहकको विद्युत् लाइन काट्न शुरु गरेको हो ।
बाँकी बक्यौता रकम समयमा नबुझाउने र पटक पटक समयमै विद्युत् महशुल बुझाउन आग्रह गर्दासमेत बेवास्ता गर्ने ग्राहकको विद्युत् लाइन काट्न थालिएको प्राधिकरण वितरण केन्द्र लहानका प्रमुख विष्णुदेव यादवले जानकारी दिनुभयो ।
उहाँका अनुसार पहिलो चरणमा लामो समयदेखि बक्यौता नबुझाउने तीन फेजका २२० ग्राहकको विद्युत् लाइन काटिने छ ।
ग्राहकबाट विद्युत् महशुलबापत रु तीन करोडभन्दा बढी बक्यौता रहेको केन्द्रले जनाएको छ । प्राधिकरण वितरण केन्द्र लहानमा ४५ हजार ग्राहक छन् ।
