मधेशी, आदिवासी जनजाति र खस आर्य सम्मिलित छुट्टै पार्टी बनाएर फोरम नेपालका अध्यक्ष उपेन्द्र यादवले हिमालसम्म संगठन निर्माण गर्नुभयो । देशभरि प्रतिनिधिसभाको १६५ सीटमध्ये फोरम नेपालले १३० सीटमा उम्मेदवारी दिएको थियो । फोरम नेपालले प्रति। निधिसभामा १० र प्रदेशसभामा २४ सीट जितेको छ । देशैभरि संगठन रहेको दावी गर्ने फोरम नेपालले प्रदेश–२ मा मात्र आफ्नो प्रभाव देखाउन सकेको छ । सो प्रदेशबाट प्रतिनिधिसभामा नौ र प्रदेशसभामा २० सीट प्राप्त गरेको छ । फोरम नेपालले तराई मधेशमा राजपा नेपाल र दुई ठाउँमा काँग्रेससँग चुनावी तालमेल गरेको थियो

अशोक राई फोरम नेपालसँग एकीकरण गर्दा पाँचजना सांसद लिएर जानुभएको थियो । राई एमालेबाट अलग भएर आदिवासी जनजातिहरुलाई समेटेर देशैभरि संगठनको स्वरुप दिनुभयो र पाँचवटा समानुपातिक सीट हात पार्नुभएको थियो । तर मधेशवादी दलसँग एकीकरण गरेपछि उहाँ स्वयं पराजित हुनुभयो भने सो दलले हिमाल र पहाडबाट प्रत्यक्षमा विजय हात पार्न सकेन ।
फोरम नेपालका उपाध्यक्ष राजेन्द्र श्रेष्ठले चुनावै जित्ने गरी पहाडमा संगठन निर्माण नभएको बताउनुभयो । “एकीकरण नहुँदा पार्टी एउटा संरचनामा थियो । एकीकरण भएपछि त्यो संरचना भत्कियो । नयाँ संरचना बनाउँदै गर्दा चुनाव भयो त्यही भएर कमजोर देखिएको हो” उहाँले भन्नुभयो ।
बारा–२ बाट प्रतिनिधिसभा सदस्यमा विजयी हुनुभएका पार्टीका महासचिव रामसहाय यादवले हिमाल–पहाडमा संगठन निर्माणकै अवस्थामा रहेका कारणले परिणाम त्यस्तो देखिएको तर्क गर्नुभयो । उहाँले आफूहरुको जनाधार मधेशमात्र भएको र अब विस्तारै पहाडमा पनि संगठन बलियो हुँदै गरेको बताउँदै अगामी चुनावमा आफूहरु विजयी हुने दावी गर्नुभयो ।