२१ मंसिर,अछाम । विहान सात बजेबाट बमका आवाजसँगै मतदान सुरु भएको छ । सबैको ध्यान मतदान केन्द्रमै छ । मतदाताले मतदान गरिरहेका छन् भने मतदान केन्द्र आसपासमा बम विस्फोट भइरहेका घटना सार्वजनिक भइरहेका छन् । तर, अछाममा भने निर्वाचन कार्यालयमै बम भेटिएको छ ।
जिल्ला सदरमुकाम मंगलसेनस्थित जिल्ला निर्वाचन कार्यालयमा बुधबार विहान बम भेटिएको थियो । बमसँगै कर्मचारी आतंकित हुनुको साथै भागदौड मच्चिएको थियो ।
सुरक्षाकर्मीको टोलीले बमलाई निष्कृय पारेको थियो । यसैबीच नेकपा एमालेका उपाध्यक्ष भीम रावलले मतदान गर्ने भागेश्वर मतदान केन्द्रमा भेटिएको टाइम सेनाको टोलीले निष्कृय पारेको बताइएको छ ।
त्यसैगरी अछामको क्षेत्र नम्बर २ को विनयाकमा पनि बम विस्फोट भएको जानकारी प्राप्त भएको छ । विनायक नगरपालिकाको मतदान केन्द्रबाट केही टाढा विस्फोटको अावाज सुनिएको स्थानीयले जानकारी दिएका छन् ।
