काठमाडौं २० मंसिर।
मौसम बदलीका कारण काठमाडौं उपत्यकामा आजविहान हल्का पानी परेको छ । मनाङ लगायतका हिमाली जिल्लामा भने हिमपात भएको मौसमविदहरुले बताएका छन् ।
मौसमविद समीर श्रेष्ठले काठमाडौं र ललितपुरमा हल्का पानी परेको जानकारी दिनुभयो । उहाँका अनुसार भक्तपुरमा भने वर्षा भएको छैन । यस्तै पश्चिम नेपालका धेरैजसो हिमाली बस्तीमा हिउँ परेको श्रेष्ठले बताउनु भयो ।
मनाङ जिल्लामा पहिलो चरणको प्रदेश र प्रतिनिधिसभा चुनावको बेला माथिल्लो क्षेत्रमा हिउँ परे पनि तल्ला बस्तीहरुमा हिउँ परेको भने यस वर्षकै पहिलो हो । मनाङका भ्राका, टंकी लगायत बस्तीमा हिउँ परेको स्थानीयले बताएका छन् ।
नेस्याङ गाउँपालिकाको अधिकांश ठाउँमा हिउँ परेको छ । सुक्खा जमिनमा हिउँ परेपछि स्थानीयबासी बाली सप्रिने आशले खुसी भएका छन् । सो क्षेत्रमा चिसो पनि अत्याधिक मात्रामा बढेको छ ।
मौसमविद श्रेष्ठका अनुसार अरब सागरको चक्रवातको असरका कारण नेपालमा हिउँ र पानी परेको हो । यसको प्रभाव आजबाट बिस्तारै कम हुँदै गए पनि असर भने अझै केही दिनसम्म कायम रहने बताइएको छ ।
