१९ मंसिर,विराटनगर ।
नेपाल-भारत सीमाका सबै नाका ७२ घण्टासम्मको लागि सिल गरिएको छ । यही मंसिर २१ गते हुने दोस्रो चरणको प्रतिनिधिसभा र प्रदेशसभाको निर्वाचनलाई मध्यनजर गर्दै मंगलबार विहानदेखि नेपाल-भारत सीमासँग सीमा नाका सिल गरिएको हो ।
मोरङमा मात्रै ४२ किलोमिटर लामो सीमा नाका छ । प्रमुख जिल्ला अधिकारी रामप्रसाद आचार्यका अनुसार सबै नाका विहानैबाट सिल गरिएको छ ।
सोमबार राति १२ बजेदेखि बन्द गरिएका सबै नाका मंसिर २१ गते राति १२ बजेपछि मात्रै खुल्नेछन् ।
यता ,कपिलवस्तुमा पनि सीमा नाका तीन दिनका लागी बन्द गरिएको छ । बोर्डर सिलका लागि भारतीय अधिकारीसँग समन्वय गरिएको प्रजिअ मदन भुजेलले जानकारी दिए । तीन दिन भारतबाट नेपाल र नेपालबाट भारत पैदल यात्रामा समेत रोक लगाईएको छ । यस्तै सावारी साधानहरु टांगा, साईलक, ट्रक, जीप, ट्याक्टर, कार, बसलाई समेत आवतजावत गर्न निषेध गरिएको प्रजिअ भुजेलले बताए ।
जिल्लाका तीन प्रतिनिधिसभा र छ प्रदेशसभामा निर्वाचन हुँदैछ । जिल्लामा कृष्णनगर, मर्यादपुर चाकरचौडा लगायत गरि एक दर्जन सीमानाका छन । यसैबीच यहाँका २ सय ३३ मतदानस्थल मध्ये एक सय ५३ मतदान स्थललाई अति संवेदनशीलको सूचीमा राखिएको छ ।
निर्वाचनमा नेपाली सेना, नेपाल प्रहरी, सशस्त्र प्रहरी र म्यादी गरी पाँच हजार तीन सय ४१ सुरक्षाकर्मी परिचालन हुनेछन् । म्यादी, २ हजार चार सय ७४ नेपाल प्रहरी एक हजार दुई सय सात, सशस्त्र प्रहरी आठ सय १० र नेपाली सेना आठ सय ५० निर्वाचन सुरक्षाको लागि खटिनेछन् ।
मतदानस्थल र केन्द्रमा पहिलो घेरामा म्यादी र नेपाल प्रहरी, दोस्रो घेरामा सशस्त्र र तेस्रो घेरामा नेपाली सेनाले सुरक्षा प्रदान गर्नेछन् । निर्वाचन स्थलमा नेपाल प्रहरी र सशस्त्र प्रहरीको टोलीले पेट्रोलिन समेत गर्नेछ ।
