काठमाडौं,मंसिर १८ ।
निर्वाचन नजिकिदै गर्दा राजधानीमा वम विष्फोटका घटना अत्यधिक बढेका छन् । उच्च सुरक्षा रहेको भनिएपनि काठमाण्डौका बिभिन्न स्थानमा बम बिस्फोटका घटना रोकिएका छैनन् ।
आज मध्यान्ह काठमाण्डौको चपली हाइटमा बम बिष्फोटन हुँदा पूर्व मन्त्री तथा काग्रेस उम्मेदवार गगन थापा सहित १० जना घाईते भएका छन् ।
चुनावी घरदैलोमा जादैँ गरेका काठमाडौं क्षेत्र नम्बर ४ का उम्मेदवारसमेत रहेका थापालाई लक्षीत गरेर काठमाडौंको बुढानिलकण्ठ, चपलीस्थित भंगाल महादेव कोलनी छेउमा अज्ञात समुहले बम प्रहार गरेको हो ।
घाइते हुनेमा प्रदेश सभाका कांग्रेस उम्मेदवार साधुराम खड्कासहित राजकाजी श्रेष्ठ, जयराम लामिछाने, ध्रुव खड्का, पूर्णबहादुर श्रेष्ठ, रेणु बरुवाल, श्यामकृष्ण श्रेष्ठ, सुमन खड्का, रवीन्द्र कार्की, काशीलाल श्रेष्ठ, परशुराम थापा रहेका छन् ।
घाईते मध्ये श्याम कृष्ण श्रेष्ठ र राजकाजी श्रेष्ठको अवस्था गम्भिर रहेको छ । उनीहरु सबैको त्रिवि शिक्षण अस्पताल महाराजगञ्जमा उपचार भईरहेको छ ।
गगन थापाको गर्धन र ढाडमा चोट लागेको छ । थापाले अस्पतालबाट नै आफ्ना मतदाताहरुलाई यस्ता घटनाहरुबाट विचलित र आतंकित नहुन आग्रह गर्नुभएको छ ।
बम आक्रमण भएलगत्तै त्यसआसमासमा सुरक्षा व्यवस्था कडा बनाएर आक्रमणकारीको खोजी कार्य जारी राखिएको प्रहरीले जनाइएको छ ।
थापाको अवस्थाबारे बुझ्न शिक्षण अस्पताल महाराजगञ्ज पुगेका शुभेच्छुकहरुले काठमाडौंमै सुरक्षाको प्रत्याभूति हुन नसकेको गुनासो गरेका छन् ।
