काठमाडौँ, १८ मंसिर ।
राष्ट्रिय पुनःनिर्माण प्राधिकरणका प्रमुख कार्यकारी अधिकृत युवराज भुसालले नवनियुक्त प्राविधिकलाई पक्षपातरहित भएर काम गर्न निर्देशन दिनुभएको छ ।
भूकम्प प्रभावित ३१ जिल्लामा आजबाट खटिएका नवनियुक्त इञ्जिनियर तथा सव इञ्जिनियरलाई शपथ गराउँदै उहाँले प्रभावकारी काम गर्न निर्देशन दिनुभयो ।
शपथ समारोहलाई सम्बोधन गर्दै उहाँले भूकम्प प्रभावित जनताको आँशु पुछ्ने जिम्मेवारी दिएको भन्दै कार्य क्षेत्रमा प्रभावकारी काम गर्न नवनियुक्त प्राविधिकलाई आग्रह गर्नुभयो ।
राष्ट्रिय पुनःनिर्माण प्राधिकरणबाट लिइएको परीक्षामा उत्तीर्ण भएकामध्ये पहिलो चरणमा ३७४ जना इञ्जिनियर र ३९१ सव इञ्जिनियरले ईश्वर र कुलदेवताको नाममा शपथ लिएका छन् ।
भूकम्प प्रभावित ३१ जिल्लाका २८२ वटा स्थानीय तहमा परिचालन हुने प्राविधिकले प्रत्येक वडामा निजी आवास पुनःनिर्माणका लागि सहयोग गर्नेछन् ।
