काठमाडौ १७ मंसिर ।
सूचना तथा सञ्चारमन्त्री मोहनबहादुर बस्नेतले सरकार अपाङ्गता भएकाहरुको हितका लागि कटिबद्ध रहेको बताउनुभएको छ ।
छब्बिऔँ अन्तर्राष्ट्रिय अपाङ्गता दिवसका अवसरमा आज आयोजित कार्यक्रममा नेपाली काँग्रेसका नेतासमेत रहेका बस्नेतले नेपालमा भएका लोकतान्त्रिक आन्दोलनमा आपाङ्ग भएका व्यक्तिको पनि ठूलो योगदान रहेको चर्चा गर्नुभयो ।
उहाँले निर्वाचनले लोकतन्त्रलाई संस्थागत गर्ने भएकाले विवेक पु¥याएर मतदान गर्न सबैलाई आग्रह गर्दै निर्वाचनपछि देश समृद्धिको बाटोमा जाने बताउनुभयो ।
यसैबीच आज सबैका लागि दिगो र समतामूलक समाजउन्मुख रुपान्तरण’ भन्ने नाराका साथ २६ औं अन्तर्राष्ट्रिय अपांगता दिवस, नेपालमा विभिन्न कार्यक्रमको आयोजना गरी मनाईएको छ ।
विश्व स्वास्थ्य संगठन डब्लु एचओको आह्वानमा सन् १९९२ देखि प्रत्येक वर्ष डिसेम्बर ३ तारीखका दिन विश्वभर यो दिवस मनाउने गरिन्छ ।
विश्वको कूल जनसंख्यको १५ प्रतिशत मानिसहरुमा कुनै न कुनै रुपमा अपांगता रहेको पाइएको विश्व बैंक र विश्व स्वास्थ्य संगठनले सन् २०११ मा प्रकाशित गरेको तथ्यांकमा उल्लेख छ ।
२०६८ सालको जनगणना अनुसार नेपालको कूल जनसंख्यको एक दशमलव ९४ प्रतिशत अपांगता भएका व्यक्ति रहेका छन् ।
दिवसका अवसरमा शुभाकामना दिैँदै राष्ट्रपति विद्यादेवी भण्डारीले नेपालमा अपाङ्गता भएका व्यक्तिको अधिकार प्रवर्द्धनका लागि क्रमिक रुपमा विभिन्न काम भइरहेको बताउनु भयो ।
अपाङ्गता भएका व्यक्तिलाई दया र मायाको दृष्टिले भन्दा पनि अधिकारमुखी दृष्टिकोणबाट हेर्दै उनीहरुलाई विकासको मूल प्रवाहमा समावेश गरी आत्मनिर्भर बनाउदै लैजानु आजको आवश्यकता भएको उहाँले सन्देशमा उल्लेख गर्नुभएको छ ।
संयुक्त राष्ट्रसंघीय अपाङ्गता सम्बन्धी महासन्धिमा उल्लिखित अधिकार कार्यान्वयनका लागि नीति तथा कानून निर्माण गरी अपाङ्गता भएका व्यक्तिको शिक्षा, स्वास्थ्य, रोजगारी र पुनःस्थापनाका लागि सरकारी तथा गैरसरकारी क्षेत्रबाट विशेष पहल हुन जरुरी रहेकोमा जोड दिनुभएको छ ।
