१२ मंसिर,काठमाडौँ । ताप्लेजुङको एक मतदानस्थलमा नै बम विस्फोट भएपछि सुरक्षाको लागि खटिएका एक असईसहित ६ जनालाई निलम्बन गरिएको छ ।
सुरक्षा संवेदनशीलतामा हेलचेक्र्याइँ गरेको भन्दै प्रहरी सहायक निरीक्षक गंगादेवी खत्रीसहित ६ प्रहरीलाई निलम्बन गरिएको जनाइएको छ ।
प्रहरी स्रोतकाअनुसार निलम्बन हुनेहरुमा एक असइ, एक हवल्दार र चारजना प्रहरी जवान रहेका छन् ।
गत मंसिर ९ गते ताप्लेजुङको भानु मावि मतदानस्थलमा मतदानका लागि बुथ निर्माणको कार्य भइरहेकै समयमा बम विस्फोट भएको थियो ।
मतदानस्थलमा तीन दिनअघिदेखि नै प्रहरी परिचालन गरिएपनि बम राख्दासमेत थाहा नपाएको र सुरक्षामा हेलचेक्र्याइँ गरेको भन्दै ती प्रहरीलाई निलम्बन गरीएको प्रहरी स्रोतको दाबी रहेको छ ।
निलम्बितहरुको नाम सार्वजनिक गरिएको छैन । विस्फोट भएको बम भने टाइमबम रहेको प्रहरीले बताएको छ । बुथ निर्माण भइरहेको समयमा बम विस्फोट भए पनि कुनै मानवीय क्षति भने भएको थिएन ।
बम विस्फोटपछि सो स्थानलाई परिवर्तन गर्दै सोही विद्यालयको अर्को खेल मैदानमा मतदानस्थल निर्माण गरी मंसिर १० गते मतदान गराइएको थियो ।
बम दुईजनाले राति राखेको र एउटा गेटबाटमात्रै पस्न सकिने सो बम विस्फोट भएको विद्यालयमा वरिपरि काँडेतारले परिसर घेरिएको छ । विद्यार्थीको निगरानीका लागि विद्यालय परिसरलाई कैद गर्ने गरी विद्यालयले सीसी क्यामरासमेत जडान गरेको छ ।
बम विस्फोट भएको बिहानको राति करिब २ बजे दुईजना युवक आएर सो विद्यालयको मतदानस्थान बनाउने ठाउँमा खनेर बम राखेर भागेको विद्यालयको सीसी क्यामराले कैद गरेको छ ।
सो समयमा मतदानस्थलको सुरक्षाका लागि प्रहरी सहायक निरीक्षक गंगादेवी खत्रीसहितको प्रहरी टोली परिचालन गरिएको थियो ।
बम राखेको नजिकै विद्यालय निर्माणका लागि बालुवा थुपारिएकाले बम राख्न आएकाले खनेर बम राखी पुनः पुरेर माथिबाट बालुवा छरेर भागेका थिए ।
बम राखेको १२ घन्टापछि सो बम विस्फोट भएको देखिएको छ । सो सीसीटीभीको भिडियो फुटेज प्रहरी र नेपाली सेनाले अनुसन्धानका लागि बम विस्फोट भएको केही घन्टामा नै लगे पनि हालसम्म कसैलाई पनि पक्राउ गर्न सकेको छैन ।
बम राखेको देखिने सीसीटीभी फुटेज भने कम्प्युटरको हार्ड्डिक्सबाट प्रहरीले कपी गरेर हटाएको छ ।
बम राख्ने र पड्काउने फेला नपरे पनि सुरक्षाका लागि खटिएका सुरक्षाकर्मीलाई सुरक्षामा लापरबाही गरेको भन्दै निलम्बन गरिएको हो ।
