उदयपुर,१३ मंसिर ।
उदयपुरको गढी गाउँपालीका वडा नम्बर ६ दनुवार बेसीमा माईन बम बिस्फोट भएको छ ।
निर्वाचन क्षेत्र नम्बर २ बाट प्रतिनिधिसभा सदस्यका लागि नेपाली कांग्रेसका उम्मेदवार नारायणबहादुर कार्की चढेको गाडी एम्बुसमा पर्दा कार्कीसहित ६ जना घाईते भएका छन् ।
बिस्फोटमा परी उम्मेदवार कार्की र उनका सहयोगी मीरा कटुवाल, प्रहरीजवान कालिदास श्रेष्ठ, चालक राजन कार्की, सहयोगी गणेश पुरी र ७२ वर्षीया वृद्धा धनमाया सार्की घाइते भएका हुन् ।
उनीहरु सबैलाई हेलिकोप्टरमार्फत् काठमाडौं ल्याएर उपचारका लागि त्रिवि शिक्षण अस्पताल महाराजगन्जमा भर्ना गरिएको छ ।
उम्मेदवार कार्कीको अवस्था खतरामुक्त रहेको छ । तर, सहयोगी मीरा कटुवाल, चालक राजन कार्की र वृद्धा धनमाया सार्कीको अवस्था भने गम्भीर रहेको जनाइएको छ ।
कटारीबाट उदयपुरगढीको नेपालटार बजारमा आयोजित आमसभामा सहभागी हुन कार्कीसहितको टोली जाँदै गर्दा करिब साढे १० बजेतिर सडकमुनी राखिएको बम विष्फोट भएको हो ।
प्रहरी उपरीक्षक नवराज भट्टका अनुसार उदयपुरगढी गाउँपालिकाको वडा ५ र ६ को बीचमा पर्ने दनुवार बेंसी पुग्दा कार्की चढेको बा १५ च ७८०६ नम्बर गाडी एम्बुसमा परेको थियो ।
विस्फोटमा परेको गाडी १० मिटरमाथि उफ्रिएको प्रत्यक्षदर्शीले जनाएका छन् । एम्बुस कसले थापेको हो भन्ने खुलेको छैन ।
