ललितपुर , १२ मंसिर ।
वाम गठबन्धनले आयोजना गरेको ललितपुर जिल्ला स्तरीय चुनावी सभामा बम बिस्फोट भएको छ ।
वाम गठबन्धन जिल्ला निर्वाचन परिचालन समितिले आयोजना गरेको बृहत् चुनावीसभालाई लक्षित गरी अपरान्ह तीन बम विस्फोट गराइएको हो । विस्फोटबाट मानवीय क्षति भएको छैन ।
स्थानीय नमुना मछिन्द्र आवासीय माध्यमिक विद्यालयको ७ वटा झ्यालको सिसा फुटेको छ । विस्फोटको आवाजले सर्वसाधारण भने आतंकित बनेका छन् ।
विद्यालय नजिक भएको विस्फोटका कारण जमिन खाल्डो परेको छ । विस्फोट लगत्तै पुगेको नेपाली सेनाले घटनाबारे अनुसन्धान गरिरहेको छ । घटनाको कसैले जिम्मा लिएको छैन ।
लखनखेल बसपार्क नजिक आयोजना गरिएको सभाको प्रमुख वक्ता एवं नेकपा एमालेका अध्यक्ष केपी ओलीले सम्बोधन गर्ने क्रममा बम विस्फोट भएको प्रहरीले जनाएको छ ।
बिस्फोट भएपछि सहभागीहरुबीच भागदौड मच्चिएको थियो । आयोजकले ट्याक्सीको टायर पड्केको भन्दै सहभागीलाई शान्त बनाउन खोजेका थिए ।
बिस्फोटपछि सभा केहीबेर रोकेर सञ्चालन गरिएको सभामा ओलीले भन्नुभयो ‘निर्वाचन नगरे अरु के गर्ने ? जनताले प्रतिनिधि छान्न पाउने कि नपाउने ?
बम पड्किएपछि आक्रोशित हुँदै एमाले अध्यक्ष एवं पूर्वप्रधानमन्त्रीले ओलीले भन्नुभयो , हिँड्दै छ भने मान्छे गन्तव्यमा पुग्ने कि नपुग्ने ? ’यस्ता सानातिना घटनाले निर्वाचन रोक्नु हुँदैन ।’
उक्त कार्यक्रममा माओवादी अध्यक्ष प्रचण्ड जाने भनिएपनि उहाँ सहभागी हुनु भएन । माओवादीका तर्फबाट नेता रामबहादुर थापा , र उम्मेदवार समेत रहनुभएकी नेतृ पम्फा भुषल सहभागी हुनुभएके थियो ।
