बागलुङ , ११ मंसिर ।
पहिलो चरणमा आइतबार सम्पन्न प्रतिनिधिसभा तथा प्रदेशसभा निर्वाचनका सबै मतपेटिका सोमबार सदरमुकाम ल्याईएको मुख्य निर्वाचन अधिकृतको कार्यालय बागलुङले जनाएको छ।
सदरमुकाम आसपासका मतदान केन्द्रबाट आइतबार राति नै मतपेटिका ल्याइएको भएपनि जिल्लाको पश्चिम दक्षिणका दुर्गम स्थानका मतपेटिका सोमबार साँझसम्म सदरमुकाम ल्याइएको मुख्य निर्वाचन अधिकृत प्रकाशप्रसाद पण्डितले बताउनु भयो ।
मतगणना नहुँदासम्म मतपेटिका जिल्ला समन्वय समितिको भवनको बन्द कोठामा राखिने छ ।
बागलुङको प्रतिनिधिसभा क्षेत्र नम्बर १ तथा प्रदेश १ र २ को मत पेटिकामा निर्वाचन आयोग, नेपाली कांग्रेस, नेकपा एमाले र राष्ट्रिय जनमोर्चाले आ–आफ्ना ताला लगाएका छन्। उक्त क्षेत्रमा माओवादीको उम्मेदवार नभएकाले माओवादीको ताला छैन।
प्रतिनिधिसभा क्षेत्र नम्बर २ र त्यस अन्तर्गतको प्रदेश १ र २ को मतपेटिकामा निर्वाचन आयोग, नेपाली कांग्रेस, नेकपा माओवादी केन्द्र र राष्ट्रिय जनमोर्चाको ४ वटा ताला लगाइएको छ। यस क्षेत्रमा प्रत्यक्ष उम्मेदवार नभएकाले एमालेको ताला छैन।
मतपेटिकाको सुरक्षाका लागि एउटै ढोकामा चार वटा तालाका बिच मतपेटिका राखिने ठाउँमा कडा सुरक्षा व्यवस्था मिलाइएको जिल्ला सुरक्षा समितिका संयोजक एवं प्रमुख जिल्ला अधिकारी बिष्णुबहादुर थापाले जानकारी दिनुभयो ।
चुनाव शान्तिपूर्ण रुपमा सम्पन्न भए पनि मतगणना सम्म विश्वसनीय वातावरण कायम गर्न मतपेटिका राखिएको कोठा बाहिर दल र उम्मेदवारका प्रतिनिधिलाई आलोपालो गरी हरेक समय खटाइने नेकपा एमालेका निर्वाचन बिभाग प्रमुख गोविन्द गौतमले जानकारी दिनुभयो ।
मतपेटिका सबै सदरमुकाम आए पनि मतगणना भने मंसिर २१ गतेको दोस्रो चरणको मतदान पछि मात्रै शुरु हुनेछ।
