काठमाडौं ,मंसिर ११ ।
काठमाडौंको सिनामंगलमा रहेको विमान संग्रहालय आजदेखि सबैका लागि खुला गरिएको छ । वेद उप्रेती ट्रस्टले नागरिक उडड्यन प्राधिकरणसँगको सहकार्यमा करीब ७ करोडको लगानीमा संग्रहालय सञ्चालनमा ल्याएको हो ।
कात्तिक १८ गतेबाट ९ देखि १२ कक्षाका विद्यार्थीका लागि मात्रै खुला गरिएको थियो । टिकट दर तोकिएपछि संग्रहालय सर्वसाधारण सहित सबैका लागि खुला गरिएको प्राधिकरणको सञ्चालन समितिले जनाएको छ ।
समितिले सर्वसाधारणलाई २ सय ५० रुपैयाँको टिकट तोकको छ भने परिचयपत्रबाहक विद्यार्थी तथा अपाङ्गता भएकाले १ सय २५ रुपैयाँ तिनुपर्छ ।
पाँच वर्षसम्मका बालबालिकालाई टिकट नलाग्ने तथा विदेशीले ५ सय रुपैयाँ तिनुपर्ने ट्रस्टका सीईओ वेद उप्रेतीले बताउनुभयो ।
टर्कीको राजधानी इस्तानबुलबाट काठमाडौंका लागि उडेको टर्किस ध्वजाबाहक यो विमान २०७१ फागुन २० गते अवतरणका क्रममा दुर्घटनामा परेको थियो ।
आठ महिना मात्रै उडेको एयरबस कम्पनीको ३३०–३०० सिरिजको यो विमान विश्वभर कतै पनि संग्रहालयका रुपमा प्रयोग भएको छैन । २१ दिनको अवधिमा ५० हजार बढी विद्यार्थीले संग्रहालयको अवलोकन गरेको उप्रेतीले जानकारी दिनुभयो ।
