हुम्ला । जिल्लाको एक एउटा गाउँले प्रतिनिधि सभा र प्रदेश सभाको निर्वाचनलाई बहिस्कार गरेको छ ।
हुम्लाको चंखेली गाउँपालिका–३ मेखाला गाउँले शून्य मतदान गरेको छ । गाउँकै रारा प्राविमा मतदान केन्द्र राखिएपनि बेलुका ५ बजेसम्म पनि एक जनाले पनि भोट खसालेका छैनन् । उक्त मतदान केन्द्रमा १ सय १९ मतदाता छन् ।
पत्रकार नरजन तामाङका अनुसार गत स्थानीय तहको सीमा विभाजनदेखि नै राजनीति दलहरुसँग मेखालाबासी असन्तुष्ट बनेका थिए । निर्वाचन सामाग्रीसहित कर्मचारी र सुरक्षाकर्मी विहानै मेखाला पुगेपनि दिनभर घाम तापेर फर्केका छन् ।
मेखाला शून्य मतदान भएको स्वीकार गर्दै प्रमुख जिल्ला अधिकारी लक्ष्मीप्रसाद बास्कोटाले सबै तयारीसहित कर्मचारी र सुरक्षाकर्मी विहानैबाट मतदान केन्द्रको तयारी गरेपनि ५ बजेसम्म कोही पनि मतदान गर्न नआएको बताए ।
मेखाला नेपाल कम्युनिस्ट पार्टीको प्रभाव रहेको क्षेत्र हो ।
