चितवन, १० मंसिर ।
नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले बाँदरझुलाका सुकुम्बासीलाई रोजगारीको सुनिश्चितता नभएसम्म बस्ती स्थान्तरण नहुने बताउनुभएको छ ।
माडीको बाँदरझुलामा आज आयोजित चुनावीसभालाई सम्बोधन गर्दै नेता दाहालले सुकुम्बासीका लागी जग्गा सँगै शिक्षा, स्वास्थ्य तथा रोजगारीको सुनिश्चितता नभएसम्म बस्ती स्थान्तरण गर्न नहुने बताउनुभयो ।
बस्ती स्थानान्तरणका लागि कम्तीमा पाँच कठ्ठाका दरले जग्गा आवश्यक पर्ने उहाको भनाई छ ।
यसअघि आफू प्रधानमन्त्री भएका बेला बस्तीलाई निकुञ्जले हटाउन शुरु गरे पनि आफूले सो कामलाई ठाडो निर्देशनबाट रोकेको बताउनुभयो ।
वाम गठबन्धनका तर्फबाट चितवन क्षेत्र नं ३ का उम्मेदवार दाहालले वाम गठबन्धनको बहुमत आएपछि स्थिर सरकार निर्माण हुने जिकिर गर्दै त्यसपछि सुकुम्बासी समस्याको समाधान गर्न पहिलो मन्त्रिपरिषद् बैठकबाट पारित गराउने प्रतिबद्धता व्यक्त गर्नुभयो ।
जंगलको बीच भागमा बस्ती रहेकाले वन्यजन्तु, बाढी, शिक्षा, स्वास्थ्यलगायतको समस्या रहेको सो स्थनामा उपयुक्त विकल्प पाए बस्तीलाई स्थान्तरण प्रक्रिया शुरु गरिने उहाँले बताउनुभयो ।
चितवन राष्ट्रिय निकुञ्जको भूभागमा बाँदरझुला बस्ती छ । निकुञ्जको ७०० सय हेक्टर क्षेत्रफलमा पाँच सय भन्दा बढी घरपरिवार बसोवास गर्दै आएका छन् ।
