काठमाडौ २ मंसिर ।
आसन्न प्रदेश तथा प्रतिनिधि सभा निर्वाचनमा प्रदेश नम्बर १ को सुरक्षा अवस्थाबारे छलफल गर्न विराटनगरमा आज प्रदेश स्तरीय सुरक्षा बैठक आज बस्दैछ ।
बैठकमा निर्वाचनको पूर्वसन्ध्यामा एक नम्वर प्रदेशमा पर्ने जिल्लाहरुको सुरक्षा अवस्थाबारे छलफल हुने मोरङका प्रमुख जिल्ला अधिकारी रामप्रसाद आचार्यले जानकारी दिनुभयो ।
बैठकमा प्रदेश १ का १४ जिल्लाका प्रमुख जिल्ला अधिकारी, नेपाल प्रहरी, सशस्त्र प्रहरी र राष्ट्रिय अनुसन्धानका क्षेत्रीय प्रमुखहरुको सहभागिता रहनेछ ।
यसैगरी गृह सचिव मोहनकृष्ण सापकोटा, सबै सुरक्षा निकायका प्रमुखहरु, निर्वाचन आयुक्त नरेन्द्र दाहाल र सेनाको पूर्व पृतनाका पृतनापतिको समेत सहभागिता रहने जनाइएको छ ।
बैठकमा सबै जिल्लाका प्रमुख जिल्ला अधिकारी र सुरक्षा निकायका प्रमुखहरुले आ–आफ्नो जिल्लाको सुरक्षा अवस्था, सुरक्षा चुनौती र निर्वाचनका बेला अपनाउनुपर्ने योजनाबारे प्रतिवेदन प्रस्तुत गर्नेछन् ।
त्यसपछि निर्वाचनमा अपनाइने विशेष सुरक्षा योजनाबारे छलफल गरी त्यसैअनुसारको योजना बनाइने एक सुरक्षा अधिकारीले बताए ।
निर्वाचन अघि विभिन्न उम्मेदवार र तिनका प्रचार टोलीमाथि भइरहेका आक्रमणको सन्दर्भमा सुरक्षा चुनौती बढेको भन्दै यसबारे विशेष छलफल हुने ती अधिकारीले जानकारी दिनुभयो ।
