रामेछाप । चुनावको मिति नजिकिँदै जाँदा दलका कार्यकर्ताहरुबीच आपसमा झडप बढ्न थालेका छन् । शुक्रबार रामेछापमा नेकपा एमले र माओवादी केन्द्रका कार्यकर्ताले नेपाली काँग्रेसका कार्यकर्तालाई कुटपिट गरेका छन् । बाटोमा कुरेर बसेका एमाले–माकेका कार्यकर्ताले काँग्रेस कार्यकर्ताहरु कृष्णदास सुनुवार, पार्टीका नेता शंकर पौडेल, कृष्ण बर्मेलाई कुटेका हुन् । उनीहरुको स्थानीय तामाकोशी अस्पतालमा उपचार भइरहेको छ ।
लिखु गाउँपालिका १ दुरागाउँस्थित थापा डाँडा भन्ने स्थानमा नेपाली काँग्रेसको बैठक सकि घर फर्कदै गरेका उनीहरुमाथि बाटो कुरेर बसेका बाम गठवन्धनका कार्यकर्ताहरुले एक्कासी आक्रमण गरेको काँग्रेसको आरोप छ ।
शुक्रबार साँझ ७ बजे एमाले र माकेका कार्यकर्ताले आफूमाथि एक्कासी आक्रमण गरेको घाइते शंकर पौडेलले बताए । एक्कासी १०–१२ जनाको समुहमा आएका एमाले र माकेका कार्यकर्ताले आक्रमण गरेको नेविसंघका क्षेत्रीय अध्यक्ष धिरोज खत्रीले जानकारी दिए ।
सुनियोजित ढंगले गठवन्धन सम्बद्ध कार्यकर्ताहरुले आफ्ना स्थानीय कार्यकर्तामाथि आक्रमण गरेको भन्दै खत्रीले घटनाको भत्सर्ना गरेका छन् ।
यस्तै काँग्रेसको स्थानिय पार्टी समितिले पनि घटनाको निन्दा गर्दै दोषीहरुलाइ कडा भन्दा कडा कार्वाहीको माग गरेको छ। साथै घाइतेहरुको शिघ्र स्वास्थ्य लाभको कामना गरेको छ ।
