ताप्लेजुङ ।
नेपाल शिक्षक महासंघ, ताप्लेजुङ उपाध्यक्ष, अखिल नेपाल शिक्षक संगठन जिल्ला सदस्य तथा शिक्षक शुशीला बराल गौतमलाई प्रहरीले गिरफ्तार गरेको छ ।
शुक्रबार साँझ ६ बजे विद्यालयबाट फर्किए लगत्तै फुङलिङ नगरपालिका ४ भेटेरिनरी चौक आफ्नो कोठाबाट प्रहरीले गिरफ्तार गरेको छ ।
प्रहरीले गौतमको डेरामा दिनभरीको प्रयासपछि सोधपुछको लागि भन्दै, तीन जना प्रहरीले लगेको, गौतमका छोरा पवन गौतमले जानकारी दिए । आफ्नो ड्युटीबाट घर फर्के लगत्तै कोठाबाट पक्राउ गर्नुको कारण नखुलाईएको र पक्राउपूर्जीबिना पक्राउ गरिएको छोरा पवनले फक्ताङ्लुङ संबाददातालाई जानकारी दिए ।
अहिले गौतमलाई हिरासतमा राखिएको छ । ताप्लेजुङमा यसअघि नेपाल सरकारकै कर्मचारी, जिल्ला हुलाक कार्यालयमा कार्यरत कर्मचारी ध्रुब मादेनलाई पनि सामान्य राजनीतिक आस्थाकै भरमा प्रहरीले गिरफ्तार गरी हिरासतमा राखेको छ । त्यस्तै शुक्रबार नै प्रहरीले पाँचथरबाट नेपाल शिक्षक महासंघ केन्द्रीय उपाध्यक्ष टिकादेवी राईलाई विद्यालयबाट गिरफ्तार गरेको अखिल नेपाल शिक्षक संगठन सचिब कमलले जानकारी दिए ।
५ दिन अगाडि मात्र नेपाल कम्युनिष्ट पार्टीका जिल्ला जनपरिषद उपप्रमुख राकेश दाहाल सहित ८ जनालाई बिना कारण पक्राउ गरी जिल्ला प्रहरी कार्यालय, ताप्लेजुङमा राखेको छ ।
