काठमाडौ ३० कार्तिक ।
युएइको चारदिने मैत्रिपूर्ण भ्रमण सकेर राष्ट्रपति विद्यादेवी भण्डारी आज स्वदेश फर्कदै हुनुहुन्छ । युएइका युवराज शेख मोहम्मद बिन जाहेद अल नेह्यानको औपचारिक निमन्त्रणामा उहाँ गत सोमबार युएइ जानु भएको हो ।
युएई भ्रमणका क्रममा उहाँले सशस्त्र बल नायव सर्वोच्च कमान्डर समेत रहनु भएका युवराज नेह्यानसँग द्धिपक्षीय भेट गर्नुका साथै दुई देशबीचको सम्बन्ध व्यापार तथा युएइमा रहेका नेपाली श्रमिकहरुको अवस्थाबारे छलफल गर्नुभएको थियो ।
नेपाल र युएईबीच कूटनीतिक सम्बन्ध स्थापनाको ४० औँ वर्ष पुगेको अवसरमा युवराज नेह्यानको निमन्त्रणामा २६ सदस्यीय टोलीको नेतृत्व गर्दै राष्ट्रपति भण्डारी अबुधावी प्रस्थान गर्नुभएको हो ।
राष्ट्रपति भण्डारीले हिजो अबुधावीस्थित नेपाली दूतावासले आयोजना गरेको कार्यक्रममा नेपाली समुदायलाई सम्बोधन गर्दै दुई मुलुकबीचको सम्बन्धलाई थप घनिष्ट बनाउन आफूले युएइको भ्रमण गरेको बताउनु भएको छ ।
उहाँले दुई मुलुकबीच श्रम सम्झौता भइसकेको उल्लेख गर्दै घरेलु मजदुरका समस्यालाई पनि समाधान गर्नुपर्नेमा जोड दिनुभयो । राष्ट्रपतिको भ्रमणका क्रममा द्धिपक्षीय सम्बन्ध तथा सहकार्यका विषयमा दुई देशका अधिकारीहरुबीच समेत छलफल भएको थियो ।
युएई र नेपालबीच सन् १९७७ मा गुटनितिक सम्बन्ध स्थापना भएको थियो । नेपाली कामदारका लागि उत्कृष्ट गन्तव्यका रुपमा समेत रहेको युएइमा हाल २ लाखभन्दा बढी कार्यरत रहेको अनुमान गरिएको छ ।
