२९ कात्तिक, काठमाडौं ।
पछिल्लो समय पेट्रोल र डिजेलको माग वृद्धि भएको नेपाल आयल निगमले जानकारी दिएको छ ।
आयल निगमका अनुसार पछिल्लो समय मुलुकभर पेट्रोलको दैनिक खपत करिब १२ सय किलोलिटर साथै डिजेलको दैनिक खपत करिब ३५ सय किलोलिटर रहेको छ ।
सामान्य अवस्थामा पेट्रोलको खपत एक हजार किलोलिटर र डिजेलको तीन हजार हुने गरेको निगमले जनाएो छ ।
विकास निर्माणका गतिविधि शुरु हुने सिजन यही हो । निर्वाचनको माहोल उत्कर्षमा पुग्दै गर्दा इन्धन खपत पनि बढेको निगमका अधिकारीहरुको भनाइ छ । तर, अहिलेको खपत वृद्धिको मुख्य कारण निर्वाचन नै भएको उनीहरु बताउँछन् ।
निगमका प्रवक्ता वीरेन्द्र गोइतका अनुसार गत अक्टोबरमा पेट्रोल खपत ४२ हजार किलोलिटर थियो । सेप्टेम्बरमा ३८ हजार किलोलिटर पेट्रोल खपत भएको थियो । यस्तै, सेप्टेम्बरमा ८५ हजार किलोलिटर खपत भएको डिजेल अक्टोबरमा एक लाख किलोलिटर पुगेको छ ।
यसैबीच, आपूर्ति मन्त्रालयले निर्वाचनको समयमा इन्धनको आपूर्ति सहज बनाउन निगमलाई निर्देशन दिएको छ । सोहीअनुरुप निगमले आपूर्ति बढाएको छ भने भण्डारण क्षमतालाई पनि चुस्त बनाउन लागेको जनाएको छ ।
