प्रतिनिधिसभा र प्रदेश सभा निर्वाचनको पूर्वसन्ध्यामा नेपाली सेनाले पृतनापतिहरूको बैठक बोलाएको छ । सेनाले १७ कात्तिकमा आठवटै पृतनापति र काठमाडौं उपत्यकाका महानिर्देशनालय, निर्देशनालय तथा विशेष बाहिनीका प्रमुखलाई बोलाएको छ ।

‘गत वर्ष मंसिरमा यस्तो बैठक बोलाइएको थियो, यसपटक निर्वाचन सुरक्षालाई पनि मध्यनजर राख्दै चाँडै बैठक बोलाइएको छ,’ जंगी अड्डा स्रोतले भन्यो ।

पृतनापतिहरूको समन्वयात्मक बैठकमा पृतनापतिहरूले आ–आफ्नो क्षेत्रको राजनीतिक र सुरक्षासँग सम्बन्धित वस्तुस्थितिबारे ब्रिफिङ गर्नेछन् ।

बैठकको उद्घाटन रक्षामन्त्री भीमसेनदास प्रधानले गर्ने कार्यक्रम तय भएको छ । हरेक निर्वाचनअघि सेनाले यस्ता बैठक बोलाएर चुनावी परिणामको समेत व्याख्या विश्लेषण गर्ने गरेको छ ।-नयाँ पत्रिका,