कांग्रेस प्रचारप्रसार समितिका संयोजक बालकृष्ण खाणले आइतबार बिहान दुई दलसँग छुट्टाछुट्टै बैठक गरी तालमेलमा लेनदेनको विषय टुंग्याउने तयारी रहेको जानकारी दिए । ‘आइतबार बिहान दुई दलका नेतासँग छुट्टाछुट्टै बैठक बस्ने तयारी छ । त्यसले सिट बाँडफाँडको विषय टुंगिन्छ,’ खाणले भने ।
जनमत भएका राप्रपा र राप्रपा (प्रजातान्त्रिक)का शीर्ष तहका नेतालाई कांग्रेसले सहयोग गर्ने र बाँकी स्थानमा दुई दलले कांग्रेस उम्मेदवारलाई सहयोग गर्ने अनौपचारिक सहमति बनिसकेको छ । राप्रपा प्रजातान्त्रिकका अध्यक्ष पशुपतिशमशेर राणा कांग्रेसको समर्थनमा सिन्धुपाल्चोक २ बाट प्रतिनिधिसभाको उम्मेदवार बनेका छन् ।
त्यस्तै, राप्रपा अध्यक्ष कमल थापा कांग्रेसको समर्थनमा मकवानपुर १ बाट प्रतिनिधिसभामा उम्मेदवार बन्ने भएका छन् । राप्रपा महामन्त्री राजेन्द्र लिङदेनलाई प्रतिनिधिसभामा झापा–३ बाट उम्मेदवार बनाउन कांग्रेस नेता कृष्णप्रसाद सिटौला समानुपातिकमा बसेका छन् । राप्रपा प्रजातान्त्रिकका उपाध्यक्ष दीपक बोहोरा रुपन्देशी– २ बाट उम्मेदवार बनाउन कांग्रेस प्रचारप्रसार समितिका संयोजक बालकृष्ण खाण समानुपातिकतर्फ उम्मेदवार बनेका छन् ।
०७० को संविधानसभा निर्वाचनमा झापा– ३ बाट सिटौला र रुपन्देशी–३ बाट खाण विजयी भएका थिए । अहिले निर्वाचन क्षेत्र पुनरावलोकन गर्दा खाणका क्षेत्रका केही भाग बोहोराको क्षेत्रमा गाभिएको छ । त्यस्तै, कांग्रेसको समर्थनमा राप्रपा प्रजातान्त्रिकका उपाध्यक्ष विक्रम पाण्डे चितवन–३ बाट र महामन्त्री सुनील थापा धनकुटाबाट प्रतिनिधिसभाको उम्मेदवार बन्दै छन् ।
राप्रपालाई काठमाडौं–७ मा उम्मेदवार बनाउन दिने विषयमा पनि छलफल भइरहेको स्रोतले बताएको छ । राप्रपा वरिष्ठ नेता तथा पूर्वप्रधानमन्त्री लोकेन्द्रबहादुर चन्द कांग्रेसको समर्थनमा बैतडीबाट उम्मेदवार बन्ने सहमति भएको स्रोतले बताएको छ । कति स्थानमा कांग्रेसको समर्थनमा राप्रपा उम्मेदवार बन्ने र राप्रपाको समर्थनमा कांग्रेसले कति स्थानमा उम्मेदवारी दर्ता गर्ने भन्ने विषय आइतबार बिहान टुंगिने राप्रपाका सहप्रवक्ता मोहन श्रेष्ठले जानकारी दिए । -नयाँ पत्रिकाबाट
