काठमाडौँ, ११ कात्तिक ।
उपत्यकाका नदी र चक्रपथ सफाइ गरी आज ४२ मेट्रिक टन फोहर व्यवस्थापन गरिएको छ ।
वाग्मती सफाइ महाअभियानको २३३ औँ हप्तामा आज पशुपति क्षेत्रस्थित गुह्येश्वरी मन्दिर अघिको वाग्मती नदी किनारमा सफाइ गरी १४ मेट्रिक टन फोहर व्यवस्थापन गरियो ।
आगामी शनिबार २३४ औँ हप्ताको वाग्मती सफाइ शान्तिनगरस्थित भी एस निकेतन विद्यालय अघि गरिने सफाइ महाअभियानले जनाएको छ ।
गुह्येश्वरीमाथिको वाग्मती सफाइको १९३ औँ हप्तामा आज हनुमान घाट र गोठाटार पुल वरपर सफाइ गरी दुई मेट्रिक टन फोहर निकालिएको छ ।
रुद्रमती सफाइको १९० औँ हप्तामा आज रातोपुल–कालोपुल– सिफल–गौशाला हुँदै पुनः रातोपुलसम्म सफाइ गरिएको रुद्रमती सरोकार समाजका उपाध्यक्ष रोहित गिरीले बताउनुभयो । सफाइबाट एक मेट्रिक टन फोहर व्यवस्थापन गरिएको छ ।
उता विष्णुमती सफाइको १६१ औँ हप्तामा तारकेश्वर र टोखा नगरपालिका सीमा मनमैजुमा चार मेट्रिक टन र मनोहरा नदी सफाइको ३१ औँ हप्तामा हनुमन्ते दोभानस्थित बिपी आँखा अस्पताल क्षेत्र वरपर सफाइ गरी पाँच मेट्रिक टन फोहर निकालिएको छ ।
चक्रपथ सफाइको २९ औँ हप्तामा सामाखुसी चोकदेखि नयाँ बसपार्कको शिव मन्दिरसम्म सफाइ गरी १२ मेट्रिक टन फोहर व्यवस्थापन गरिएको छ ।
यसैगरी मीनभवन आलोकनगर सफाइको २९ औँ हप्तामा त्यस क्षेत्रमा सफाइ गरी एक मेट्रिक टन फोहर व्यवस्थापन गरिएको अभियानकर्मी प्रमिला पौडेलले बताउनुभयो ।
यसैगरी चक्रपथको बाफल सफाइको ११ औँ हप्तामा सीतापाइला–बाफल–स्युचाटारसम्म सफाइ गरी तीन मेट्रिक टन फोहर व्यवस्थापन गरिएको छ ।
