झापा, कात्तिक ८ ।
डेंगुको संक्रमणबाट झापामा एक महिलाको मृत्यु भएको छ । मृत्यु हुनेमा झापा अर्जुनधारा नगरपालिकाकी ३५ वर्षीया सुनिता बराल रहेकी छिन् । उनको उपचारका क्रममा मृत्यु भएको हो ।
जनस्वास्थ्य कार्यालयका महामारी रोग फोकल पर्सन कुलबहादुर पौडेलले समयमा उपचारको पहुँचमा पुग्न नसक्दा ती महिलाको मृत्यु भएको बताउनु भयो ।
जनस्वास्थ्य कार्यालयका भेक्टर कन्ट्रोलर बेदप्रसाद घिमिरेले तिहारअघि ८१ जना संक्रमित भेटिएकोमा अहिले संक्रमित हुनेको सङ्ख्या ३ सय ४१ जना पुगेको जानकारी दिनुभयो ।
जनस्वास्थ्य कार्यालयको टोलीले दुई दिन लगाएर झापाका सरकारी तथा निजी अस्पताल र क्लिनिकबाट डेंगु संक्रमित बिरामीको तथ्यांक संकलन गरेको थियो । डेंगु संक्रमितमध्ये करिव तीन सय विर्तामोड नगरपालिका भित्रकै छन् ।
झापामा डेंगुको प्रकोप फैलिएको भन्दै आवश्यक सतर्कता अपनाउन जनस्वास्थ्य कार्यालयले सर्वसाधारणमा अपिल गरिरहेका बेला एक सातायता डेंगु संक्रमित विरामीको संख्या अस्वाभाविक रुपमा बढेको हो ।
डेंगुको प्रकोप फैलिएपछि विर्तामोड नगरपालिकाले सबै वडामा अविलम्व नियन्त्रण अभियान सुरु गर्न वडाध्यक्षको नेतृत्वमा टोली परिचालन गरेको छ ।
