५ कात्तिक, काठमाडौं । राजधानीको लैनचौर म्हैपीमा आज बिहानै गोली चलेको छ ।
गोली लागेर कल्याण गुरुङ नाम गरेका युवक घाइते भएको काठमाडौं प्रहरी परिसरले जनाएको छ ।
घुँडामुनि गोली लागेका गुरुङको अहिले शिक्षण अस्पताल महामराजगञ्जमा उपचार भईरहेको छ ।
आज विहान साढे ३ बजेतिर उक्त घटना भएको काठमाडौं प्रहरी प्रमुख एसएसपी रविन्द्र धानुकले बताउनु भयो ।
घटनापछि प्रहरीले शंकास्पद ५ जनालाई नियन्त्रणमा लिएको लैनचौर प्रहरीले जनाएको छ ।
म्हैपीस्थित सडकमा स्कुटरमा हिँडिरहेका बेला एक समूहले बाटो छेकेर गोली प्रहार गरेको गुरुङ प्रत्यक्षदर्शीले बताएका छन् ।
प्रहरी स्रोतका अनुसार शनिबार राति लैनचौरस्थित एक डिस्कोमा नाच्न भेला भएका समूहवीच झगडा भएको थियो । सोही झगडाका कारण बिहान साढे ३ बजेतिर गोली चलेको प्रहरीको प्रारम्भिक अनुमान छ ।
राति डिस्कोमा झगडा भएको र विहान गोली चलेको पुष्टि गर्दै एसएसपी दिवेश लोहनीले घटनाबारे अनुसन्धान भइरहेकोे जानकारी दिनुभयो ।
काठमाण्डौमा अघिल्लो साता मात्रै निर्माण व्यवसायी शरदकुमार गौचनको गोली हानी हत्या भएको थियो । गौचनको हत्या हुनुभन्दा केही समयअघि प्रहरीले राजधानीबाटै साना हतियारसहित केही व्यक्तिलाई पक्राउ गरेको थियो ।
