असोज २ काठमाण्डौं ।
सरकारले निजी अस्पतालमा उपचारका क्रममा बिरामीको मृत्यु हुने घटना बढेपछि यसको रोकथामका लागि स्वास्थ्य मन्त्रालयअन्तर्गत एक समिति गठन गर्ने र सञ्चारमन्त्रीको प्रेस सल्लाहकारमा छक्कबहादुर खड्कालाई नियुक्त गर्ने निर्णय गरेको छ ।
सोमबारको मन्त्रीपरिषद बैठकले अस्पतालहरुमा देखिएको लापरवाही नियन्त्रण गर्न सम्बन्धित चिकित्सकबाट क्षतिपूर्ति गराउने कानुन बनाउन स्वास्थ्य मन्त्रालयलाई निर्देशन दिने निर्णय पनि गरेको छ ।
मन्त्रिपरिषदले प्रदेश सभा निर्वाचन प्रयोजनका लागि पिछडिएको क्षेत्र र अल्पसंख्यक समुदाय तोकेर राजपत्रमा सूचना प्रकाशित गर्ने निर्णय गरेको छ ।
बैठकले गैरआवासीय नेपाली सम्मेलनका लागि उच्चस्तरिय आयोजक समिति गठन गर्ने निर्णय गरेको छ । सम्मेलन असोज २८ देखि ३० गतेसम्म काठमाडौमा हुँदैछ ।
बैठकले संयुक्त राष्ट्रसंघ सुधार सम्बन्धी राजनीतिक घोषणापत्रमा राजदूत दुर्गा भण्डारीलाई हस्ताक्षेर गर्ने अधिकार प्रत्यायोजन गरेको छ ।
आणविक अस्त्र निषेध सम्बन्धी सन्धीमा हस्ताक्षर गर्न उपप्रधान तथा परराष्ट्रमन्त्री कृष्णबहादुर महरालाई अधिकार प्रत्यायोजन गरिएको छ ।
यसैगरी नेपाल आयल निगमका कार्यकारी निर्देशक गोपालबहादुर खड्कालाई पदबाट बर्खास्त गरेको छ ।अनियमितता गरेको र विभागीय मन्त्रीलाई अटेर गरेकाले खड्कालाई पदच्यूत गर्ने निर्णय गरेको सरकारका प्रवक्ता एवं सूचना तथा सञ्चारमन्त्री मोहनबहादुर बस्नेतले जानकारी दिए ।
