काठमाडौं, २३भदौ ।
सरकारले दसैंका लागि अग्रिम टिकट बुकिङ नखुलाउने यातायात व्यवसायीलाई कारबाही गर्ने तयारी गरेको छ ।
हिजो देखि नै अग्रिम टिकट बुकिङ खुलाउन यसअघि नै व्यवसायी र यातायात व्यवस्था विभागबिच सहमती भए पनि उनीहरुले भाडा बढाउन र छतमा यात्रु राख्न पाउनुपर्ने माग गर्दै टिकट बुकिङ गर्न आनाकानी गरेपछि विभागले कारवाहीको तयारी गरेको हो ।
हिजो टिकट बुकिङ नगरेका व्यवसायीलाई आज टिकट बुकिङ खुलाउन लिखित निर्देशन दिने र त्यसको पनि अटेर गरे जरिवानादेखि रुट इजाजत खारेज सम्म गरिने विभागका महानिर्देशक रुपनारायण भट्टराईले जानकारी दिनुभयो ।
उहाँले कुनै पनि हालतमा छतमा यात्रु राख्न नदिने भन्दै त्यसो गरेको भेटिए इजाजत खारेज गरिदिने स्पष्ट पार्नुभयो । यस्तै उहाँले त्यसका लागि आज देखि १० वटा अनुगमन टोली खटिएको जानकारी पनि दिनुभयो ।
टोलीले बढी भाडा लिए, सिटभन्दा बढी यात्रु राखे, गाडीको मोडल परिवर्तन गरेर चलाए र रुट इजाजत नलिइ चलाएको भेटिए कानुन अनुसार ५ हजार जरिवानादेखि इजाजत रद्दसम्म गरिदिने उहाँले बताउनु भयो ।
