काठमाडौं ,भदौ २२ ।
प्रदेश नं २ मा आगामी असोज २ गते हुने स्थानीय तह निर्वाचनमा दल तथा तीनका कार्यकर्ताले आचारसंहिता विपरितका कार्य गरेको भन्दै निर्वाचन आयोगले कडाई गर्ने भएको छ ।
हिजो उम्मेद्वारी मनोनयनका क्रममा बालवालिकालाई जुलुसमा हिँडाइएको, सवारी साधनको व्यापक प्रयोग गरिएको, कतिपय स्थानमा भोज–भतेर गरिएको जस्ता गुनासा आएपछि आयोगले कडाइ गर्ने तयारी गरेको हो ।
आयोगका प्रवत्ता नवराज ढकालले आचारसंहिता विपरितका गतिविधि बढेको भन्दै यहि अबस्था रहे कडाइपूर्वक अघि बढ्ने बताउनुभयो । उहाँले आचारसंहिता अनुगमनका लागि निगरानी सुरु गरिएको समेत जानकारी दिनुभयो ।
अनुमनका लागि २ सचिव र १४ सहसचिवलाई ८ वटा जिल्लामा खटाएको प्रवत्ता ढकालले जानकारी दिनुभयो । यस्तै सुक्ष्म अनुगमनका लागि पनि जिल्ला जिल्लामा टोली परिचालन गरिएको छ ।
अनुगमनका क्रममा आचारसंहिता विपरितका गतिविधि गरेको भेटिए तत्काल कारबाही गर्ने, उम्मेद्वारी नै रद्धसम्म हुने निर्वाचन आयोगले जनाएको छ ।
आयोगले निर्वाचनका लागी जारी गरेको निर्वाचन आचारसंहिता भित्रै रहेर प्रचारप्रसार तथा निर्वाचन गतिविधि गर्न सबै राजनैतीक दल तथा स्वतन्त्र उम्मेद्वारको ध्यानाकर्षण गराएको छ ।
