बैठकले गरेका निर्णय सार्वजनिक गर्दै अध्यक्ष दाहालले शनिबार वीरगन्जमा बसेको सचिवालय बैठक प्रदेश नम्बर–२ मा हुने आसन्न स्थानीय तहको निर्वाचनमै केन्द्रित रहेको र बैठकले सबै भन्दा बढी सिट जितेर पार्टीलाई पहिलो नम्बरको पार्टी बनाउने निर्णय गरेको जानकारी दिनुभयाे ।
निर्वाचनलाई लक्षित गरेर मधेसका जिल्ला दौडाहमा रहेको जानकारी दिदै प्रचण्डले सर्लाही र रौतहटमा मात्रै दुई चार दिन यता भएका कार्यक्रममा विभिन्न दलका केन्द्रीय स्तरका नेतासहित नौ हजार नेता कार्यकर्ता माओवादीमा प्रवेश गरिसकेकाे र अरु जिल्लामा पनि माओवादी प्रति मधेसी जनताको प्रवेश गर्ने लहर नै चलेकोले प्रदेश नम्बर–२ मा एक नम्बर पार्टीको रुपमा स्थापित हुने प्रबल सम्भावनाउहाँले भन्नुभयाे ।
स्थानीय तह तथा प्रदेशसभा र प्रतिनिधी सभाको निर्वाचनपछि फेरि पनि संविधान संशोधनका लागि प्रयास गर्ने निर्णय सचिवालय बैठकले गरेको जानकारी अध्यक्ष दाहालले दिनुभयाे ।
माओवादी सचिवालय बैठकले मधेसका बाढीपीडित क्षेत्रलाई संकटग्रस्त क्षेत्र घोषणा गर्न सरकारसंग माग गर्ने निर्णय पनि गरेको छ । सचिवालय बैठकमा भारत भ्रमणका बेला प्रधानमन्त्री शेरबहादुर देउवाले संविधान संशोधनका विषयमा दिएको अभिव्यक्तिका विषयमा पनि छलफल भएको अध्यक्ष दाहालले जानकारी दिनुभयाे ।
शनिबार वीरगन्जमा बसेको सचिवालय बैठकमा गृहमन्त्री जनार्दन शर्मा , परराष्ट्रमन्त्री कृष्ण महारा , शहरी विकासमन्त्री प्रभु साह, सामान्य प्रशासनमन्त्री टेकबहादुर बस्नेतका साथै सचिवालय सदस्यहरु नारायणकाजी श्रेष्ठ , अमिक शेरचन, रामबहादुर थापा बादल, मातृका यादव, हितराज पाण्डे, गोपाल किराँती, दीनानाथ शर्मा, वर्षमान पुन, महेश्वर दाहाल, पार्टीकी प्रवक्ता पम्फा भुषाल लगायतको सहभागीता थियो ।
