काठमाडौ १७ भदौ ।
काठमाडौ उपत्यकासहित देशका अधिकांश स्थानमा आज पनि वर्षा हुने जल तथा मौसम पूर्वानुमान विभागले जनाएको छ ।
मनसुनी न्यूनचापिय रेखा नेपाल नजिकै रहेको तथा पूर्वमा उत्तर–दक्षिण भएर रहेको न्यूनचापिय रेखाको प्रभावले देशका अधिकांश स्थानमा पानी पर्ने मौसमविद विभूति पोख्रेलले बताउनुभयो ।
पानी परेसँगै पूर्वको झापाबाट पश्चिममा कञ्चनपुरसम्म चुरेबाट प्रवाह हुने सबै साना नदी तथा महाभारतबाट प्रभाव हुने कन्काई, कमला, बागमती, तिनाउ, पश्चिम राप्ती, बबई, मोहना लगायतमा पानीको सतह बढ्ने बाढी पूर्वानुमान शाखाले अनुमान गरेको छ ।
ती नदीमा पानीको सतहले खतराको तह पार नगरेपनि बाढी आउने भएकाले नदी आसपासका बासिन्दालाई आइतबार बिहानसम्म नै सावधानी अपनाउन शाखाले आग्रह गरेको छ ।
यस्तै पहाडी क्षेत्रमा पहिरोको जोखिम बढेको भन्दै भिरालो जमिन आसपासमा बस्दा सतर्क हुन पनि शाखाले सुझाव दिएको छ । आइतबारदेखि भने पानी पर्न विस्तारै कम हुदै जाने मौसमविदले अनुमान गरेका छन् ।
