काठमाडौं, भदौ १२ – हरेक वर्ष जस्तै यसवर्ष पनि दसैँ, तिहार लगायत चाडपर्वलाई लक्षित गरी मोटरसाइकल कम्पनीले नयाँ योजना ल्याएका छन् । नेपालका लागि हिरो मोटरसाइकलको आधिकारिक विक्रेता नेपाल जेनरल मार्केटिङले ‘यो दसैँ तिहारमा भाग्यमनी भए’ भन्ने नयाँ योजना ल्याएको छ ।
योजना अन्तर्गत हिरो मोटर साइकल तथा स्कुटर किन्ने ग्राहकले ६ हजार रुपैयाँ पक्का डिस्काउन्ट, स्क्रयाच कार्डमार्फत १ हजारदेखि १ लाख रुपैयाँसम्म पाउन सक्ने र साप्ताहिक बम्पर लक्की ड्र उपहार स्वरुप एकजनाले १ लाख रुपैयाँ पाउने कम्पनीले जनाएको छ ।
यस्तै यामाहा मोटरसाइकल तथा स्कुटरको नेपालका लागि आधिकारिक विक्रेता एमएडब्लू इन्टरप्राइजेजले पनि दसैँ तिहारलाई लक्षित गरी नयाँ ग्राहक योजना ल्याएको छ । ‘क्यास इन ओ’ नाम रहेको यो योजनामा यामाहा ब्रान्डका मोटरसाइकल तथा स्कुटर किन्ने ग्राहकले तुरुन्तै ७ हजार रुपैयाँ छुट पाउनेछन् । यस्तै साप्ताहिक लक्की ड्र मार्फत एकलाख रुपैयाँ पुरस्कार र बम्पर पुरस्कारमा ब्रान्ड न्यू स्कोडा र्यापिड जित्न सक्नेछन् ।
