काठमाडौं, भदौ ८ । नेपाल उद्योग वाणिज्य महासंघकी अध्यक्ष भवानी राणले नेपालमा निर्धक्क भएर लगानी गर्न भारतीय लगानीकर्ताहरूलाई आग्रह गरेकी छन् ।
भारतको पाँचदिने राजकीय भ्रमणमा रहेका प्रधानमन्त्री शेरबहादुर देउवाको सम्मानमा भारतीय निजी क्षेत्रका प्रतिनिधिमूलक संस्थाहरू भारतीय उद्योग परिसंघ, भारतीय उद्योग वाणिज्य महासंघ र भारतीय व्यावसायिक संस्था एसोचेमले संयुक्तरूपमा नयाँदिल्लीमा नेपाल–भारत व्यावसायिक फोरम बैठक गरेका थिए ।
उक्त बैठकलाई नेपाली निजी क्षेत्रको तर्फबाट सम्बोधन गर्नेक्रममा राणाले नेपाल सरकारले सबै प्रकारको लगानीका लागि उपयुक्त वातावरण बनाउँदै गएको भन्दै ढुक्क भएर लगानी गर्न भारतीय लगानीकर्ताहरूलाई विश्वास दिलाएकी हुन् ।
अध्यक्ष राणाले नेपालमा आफूहरुले विगतदेखि नै औंल्याउँदै आएको लगानीको वातावरणमा मुख्य तगारो बनेको राजनीतिक अस्थिरता नयाँ संविधानको घोषणासँगै अन्त्य हुंँदै गएको बताइन् ।
साथै, उनले राजनीतिक नेतृत्वबाट आर्थिक मुद्दालाई मुख्य प्राथमिकतामा राखेर अगाडि बढ्ने प्रतिबद्धतासमेत व्यक्त भइसकेको स्मरण गराएकी थिइन् ।
