सिन्धुली , ८ भदौ ।
बिपी राजमार्गमा बोलेरो गाडीको ठक्करबाट मोटरसाइकलमा सवार ४० वर्षीय रामकृष्ण श्रेष्ठको मृत्यु भएको छ ।
रामटारबाट दुम्जा तर्फ गइरहेको श्रेष्ठ सवार बा ३५ प ९३२२ नम्बरको मोटरसाइकललाई काठमाडौंबाट सिन्धुलीतर्फ आउँदै गरेको बा १४ च २४९३ नम्बरको बोलेरोले ठक्कर दिँदा सिन्धुलीको सुनकोसी गाउँपालिका ५ रामटारका श्रेष्ठको घट्नास्थलमै मृत्यु भएको हो ।
गाडीको ठक्करले श्रेष्ठको मृत्यु भएपछि स्थानीयले बिपी राजमार्ग अवरुद्ध गरेका छन् । मृतकलाई उचित क्षतिपूर्ति र बोलेरोको चालकलाई कडा कारबाहीको माग गर्दै उनका आफन्त र स्थानीयले बिहीबार दिउँसो १ बजेबाट बिपी राजमार्ग अवरुद्ध गरेका हुन् ।
स्थानीयले श्रेष्ठको शव सडकमै राखेर प्रदर्शन थालेपछि बिपी राजमार्गको दुम्जा–खुर्कोट सडकखण्ड अन्तरगत सुनकोसी गाउँपालिका ५ रामटारमा अवरुद्ध भएको छ ।
मृतकका आफन्तले सडक अवरुद्ध गरेपछि बिपी राजमार्ग हुँदै काठमाडौं जाने आउँने सयौं सवारी साधन अलपत्र परेको सिन्धुलीका प्रहरी निरीक्षक सन्तोष श्रेष्ठले जानकारी दिनुभयो ।
