काठमाडौँ, २ भदौ । ऊर्जामन्त्री महेन्द्रबहादुर शाहीसँग नेपालका लागि जापानी राजदूत मासासी ओगावाले शिष्टाचार भेटघाट गर्नुभएको छ ।
ऊर्जा मन्त्रालयमा आज भएको भेटवार्तामा मन्त्री शाहीले जापान सरकारलाई ऊर्जा, सिँचाइ र खानेपानीका लागि एकीकृत परियोजना निर्माणमा लगानी गर्न आग्रह गर्नुभयो ।
जापान नेपालको एक भरपर्दो विकास साझेदार राष्ट्र भएको बताउँदै उहाँले ऊर्जा क्षेत्रमा जापानले एक नमूना परियोजना निर्माण गर्नुपर्नेमा जोड दिनुभएको मन्त्री शाहीको सचिवालयले जारी गरेको विज्ञप्तिमा उल्लेख छ ।
मन्त्री शाहीले भौतिक पूर्वाधार, कृषि, बागवानी, निर्माण, सञ्चार र मानव संशाधन विकासमा जापानी सहयोग उल्लेख्य रहेकाले जापानले ऊर्जा क्षेत्रमा नमूना परियोजना निर्माण गरेमा त्यसको महत्व निकै ठूलो हुने बताउनुभयो ।
जवाफमा राजदूत ओगावाले नेपालको ऊर्जा क्षेत्रमा लगानी गर्न जापान सकारात्मक रहेको बताउँदै तनहुँ जलविद्युत् आयोजना जापानी अन्तर्राष्ट्रिय सहयोग नियोग(जाइका)को सहयोगमा जलविद्युत् परियोजना निर्माण भइरहेको बताउनुभयो ।
उहाँले नमूना परियोजनाका लागि आफूहरुले ठोस खाका तयार गर्ने वचन दिनुभयो ।
