काठमाडौ: ललितपुरको कुसुन्ती स्थित अरुण वस्तीमा आज (सोमवार) गोली चलेको छ । गोली लागेर लागू औषधको डिलर सञ्चालक प्रविण खत्रीकोको मृत्यु भएको छ ।
प्रहरीले भने उनको उपचारका क्रममा मृत्यु भएको दावी गरेको छ । खत्री आफैले आफैलाई कञ्चटमा गोली हानेको पनि प्रहरीको दावी छ ।
प्रहरीका अनुसार सोमबार बिहानदेखि दुई वटा पेस्तोल लिएर खत्री घरबाट निस्किएका थिए । उनलाई नियन्त्रणमा लिन महानगरीय अपराध महाशाखाको टोली बिहानैदेखि परिचालित रहेको र कुसुन्तीमा एउटा घर पछाडि खत्रीलाई गोली लागेको अवस्थामा भेटिएको प्रहरीको भनाई छ ।
स्रोतका अनुसार खत्री आफनै घरको कोठामा रहेको वेला प्रहरीले घेरा हालेको थियो । प्रहरी घेराकै वीचबाट खत्री दुई वटा पेस्तोल लिएर बाहिर निस्किएका थिए। खत्रीलाई प्रहरीले लखेटेको थियो । ‘अन्त्यमा खत्री आफैले आफनै बन्दुकले गोली हानेपछि हामीले फेला पारयौ’प्रहरीले भनेको छ ।
प्रहरीले खत्रीबाट नाइन एमएमको दुई वटा अटोलोडेड पेस्तोल फेला पारेको छ । महाशाखा प्रमुख एसएसपी दिनेश अमात्यले अस्पतालबाट खत्रीको मृत्यु भइसकेको जानकारी आफूले पाएको अन्नपूर्ण अनलाईनलाई बताए ।
