रौतहट , २१ साउन ।
रौतहटको गरुडा नगरपालिका–४ स्थित खाल्डोमा जमेको पानीमा डुबेर आज एकै परिवारका ४ बालिकाको मृत्यु भएको छ ।
मृत्यु हुनेमा स्थानीय राम एकवाल साहकी छोरीहरु १२ वर्षीया संगीता साह, ९ वर्षीया सुनिता, उनका राम एकवालका भाईहरु योगेन्द्र साहकी छोरी ९ वर्षीया सुनैना साह, प्रेम साहकी छोरी ९ वर्षीया सुस्मिता साह रहेका छन् ।
मृतकहरु एकै परिवारको भएको ईलाका प्रहरी गरुडाका प्रहरी निरीक्षक केशव रेग्मीले बताउनु भयो ।
बिहान घाँस काट्न घरबाट निस्केका चारै जना बालिका दिउँसो अढाई बजेसम्म घरमा फर्केर नआएपछि उनीहरुको परिवारले खोजी सुरु गरेको थियो ।
करिब ३ बजे एकै ठाउँमा खाल्डोमा डुबेको अवस्थामा बालिकाहरुलाई फेला पारिएको प्रहरीले जनाएको छ । मृतकको शव परीक्षणको लागि जिल्ला अस्पताल गौरमा राखिएको छ ।
चन्द्रनिगाहपुर–गौर सडकसँग जोडिएको नयाँ कच्ची बाटो निर्माणको क्रममा खेतमा करिब ८ फिट गहिरो खाल्डो खनिएको स्थानीयले जनाएका छन् ।
