काठमाडौं, साउन १२ ।
प्रधानमन्त्री तथा मन्त्रिपरिषदको कार्यालयले आज उपत्यकाको सडकका खाल्डा पुर्ने कामको अनुगमन गरी सरोकार भएका कार्यालयलाई समन्वय गरेर छिटो पुर्न निर्देशन दिएको छ ।
कार्यालयको नेतृत्वमा आज बिहान नयाँबानेश्वर–पुरानो बानेश्वर–गौशाला–चाबहिल–चुच्चेपाटी–बौद्ध–जोरपाटी क्षेत्रमा अनुगमन गरिएको थियो ।
अनुगमनकाक्रममा चाबहिलमा १० ओटा ठूला खाडल अझै पुर्न बाँकी रहेको भेटिएको कार्यालयका सहसचिव दामोदर रेग्मीले जानकारी दिनुभयो ।
बौद्धको सडकमा थप सुधार गर्नुपर्ने आवश्यकता देखिएकोले कम हिलो भएको ढुंगा, गिट्टी राख्न काठमाडौं उपत्यका सडक विस्तार आयोजनालगायत सरोकार भएका कार्यालयलाई निर्देशन दिइएको उहाँले बताउनु भयो ।
यस्तै चाबहिल–गोपीकृष्ण हल–सुकेधारा–नारायणगोपाल चोक–गोल्फुटारसम्म, नारायणगोपाल चोकबाट सामाखुसी–बालाजु, फेरि नारायणगोपाल चोकबाट महाराजगन्ज–लाजिम्पाट–लैनचौर–रत्नपार्क–सहिदगेट–त्रिपुरेश्वर–टेकु–थापाथली–बबरमहलसम्म अनुगमन गरेको थियो ।
अनुगमनमा प्रधानमन्त्री तथा मन्त्रिपरिषद्को कार्यालयका सचिव चन्द्रकुमार घिमिरे र भौतिक पूर्वाधार तथा यातायात सचिव देवेन्द्र कार्की नेतृत्वको समूह सहभागी थियो ।
उपत्यकाका सडकमा खाल्डा भएका कारण एक छात्राको मृत्यु भएपछि साउन १ गते प्रधानमन्त्री शेरबहादुर देउवाले १५ दिनभित्र खाल्टा पुर्न सरोकार भएका कार्यालयका प्रमुखलाई निर्देशन दिनुभएको थियो ।
८ मिटर चौडाभन्दा ठूला खाल्डा सडक विभाग, विस्तार आयोजना, मध्यमाञ्चल सडक निर्देशनालय र डिभिजन सडक कार्यालयले पुरिरहेका छन् । चौडाइमा ८ मिटरभन्दा साना सडक पुर्ने जिम्मेवारी स्थानीय तहलाई दिइएको छ ।
