हेटौँडा, ३ साउन । त्रिभुवन राजपथको खानेगाउँनजिक आज भएको बस दुर्घटनामा परी दुई जना महिलाको घटनास्थलमै मृत्यु भएको छ ।

मृत्युहुनेमा मकवानपुर कैलाश गाउँपालिका–६ का ३५ वर्षीया कमला दोङ र सो गाउँपालिका–२ का ३० वर्षीय कुल्साङ तामाङ रहेको इलाका प्रहरी कार्यालय पालुङले जनाएको छ । मृतक दुबै महिला त्यो बसमा सवार थिए ।

मकवापुरको गोगनेबाट काठमाडौँतर्फ गइरहेको ना४ख ४५६७ नं को यात्रुवाहक बस त्रिभुवन राजपथको खानेगाउँनजिक अनियन्त्रित भई सडकबाट करिब १०० मिटर तल खसेर दुर्घटना भएको प्रहरीले जनाएको छ ।

दुघर्टनमा परी घाइते ३९ जना यात्रुलाई उपचारका लागि काठमाडौँतर्फ पठाइएको इलाका प्रहरी कार्यालय पालुङले जनाएको छ ।