काठमाडौं ,साउन २ ।
साउन महिनाको पहिलो सोमबार आज मुलुकभरका शिवालयमा बिहानैबाट दर्शनार्थीको घुईंचो लागेको छ ।
हिन्दुधर्मावलम्बीले भगवान शिवको पुजाआरधना गरी आज साउने सोमबार मनाउँदैछन् । साउनको हरेक सोमबार भगवान शिवको आराधना एवम् ब्रत गर्नाले मनोकांक्षा पुरा हुन्छ भन्ने धार्मिक बिश्वास छ ।
साउनको सोमबारमा शिवलाई शुद्ध जल चढाउँदा मनोकामना पुरा भई अटल सौभाग्य प्राप्त हुने शास्त्रीय मान्यता रहि आएको छ ।
विशेष गरी महिलाहरु हरियो पहिरनमा चुरा र मेहंदी लगाएर भगवान शिवको पुजा आराधना गर्दै ब्रत बस्ने गर्छन् ।
यसैबीच साउनको सोमबार आज काठमाण्डौको पशुपति मन्दिर सहित मुलुकका शिवालयमा बिहानैबाट भक्तजनको घुईंचो लागेको छ ।
सुनसरीको चतरा, झापाको अर्जुनधारा, भक्तपुरको डोलेश्वर महादेव, रुपन्देहीको बोलबमधाम, धनकुटाको मुलघाटस्थित विश्रान्ति मन्दिरमा जल चढाउनेको घुईंचो लागेको हाम्रा सहकर्मीहरुले जनाएका छन् ।
आज बिहान पशुपतिनाथ मन्दिरमा बिहान २ बजेदेखि भक्तजन लाममा बसे पनि सवा ३ बेजेपछि मात्र तीन ढोका खोलिएको पशुपति क्षेत्र विकास कोषका निर्देशक भोला सिटौलाले जानकारी दिनुभयो ।
पशुपतिको उत्तर, पश्चिम र दक्षिण ढोकाबाट प्रवेश गरी अहिले भक्तजनले दर्शन गरिरहेका छन् । पशुपतिमा विशेष पूजाका लागि आर्यघाटबाट पूर्व ढोकातिर पठाउने व्यवस्था मिलाइएको उहाँले बताउनुभयो ।
प्रधान न्यायाधीश गोपाल पराजुलीले बिहान ७ बजे पश्चिम ढोकाबाट प्रवेश गरी पशुपतिनाथको दर्शन गर्नुभएको छ । आजदेखि देशका विभिन्न भागमा बोलबम यात्रा शुरु भएको छ ।
