काठमाडौं , असार २९ ।
सरकारले मुख्य सचिवमा राजेन्द्रकिशोर क्षत्रीलाई नियुक्त गरेको छ । मन्त्रिपरिषद्को आज बिहान बसेको बैठकले क्षत्रीलाई मुख्य सचिव बनाउने निर्णय गरेको हो ।
मुख्य सचिवको दौडमा वरिष्ठ सचिवहरु नारायण गोपाल मलेगो, शान्तवहादुर श्रेष्ठ, शान्तराज सुवेदी, शंकर अधिकारी, ङइन्द्र उपाध्याय र लोकदर्शन रेग्मी हुनुहुन्थ्यो ।
ति मध्ये वरिष्ठताका आधारमा क्षेत्रीलाई मुख्य सचिवमा वढुवा गरिएको अर्थमन्त्री एवं सरकारका प्रवक्ता ज्ञानेन्द्र वहादुर कार्कीले जानकारी दिनुभयो ।
मुख्यसचिव सोमलाल सुवेदी कार्यकाल नसकी एडीवीको जागिर खान फिलिपिन्सको मनिला गएपछि सरकारले क्षेत्रीलाई सो पदमा बढुवा गर्ने निर्णय गरेको हो ।
मुख्य सचिवमा बढुवा हुनुभएका क्षेत्री करिब ४ महिना मात्रै पदमा रहनुहुनेछ । ५८ वर्षे उमेर हदका कारण क्षेत्रीले आगामी कार्तिक ८ गते अनिवार्य अवकास पाउनुहुनेछ ।
तत्कालीन मुख्य सचिव सोमलाल सुवेदी आफ्नो पद अतिरिक्त समूहमा राखी काजमा एडीबीमा गएपछि सरकारले प्रधानमन्त्री कार्यालयका सचिव केदारबहादुर अधिकारीलाई निमित्त मुख्य सचिव तोकेको थियो ।
मुख्यसचिवका सबभन्दा वरिष्ठ दाबेदार सचिव धनबहादुर तामाङले विशिष्ट श्रेणीको ५ वर्षे पदावधि पूरा गरी बुधबार अनिवार्य अवकाश पाउनुभएको हो ।
मन्त्रिपरिषद्ले मंगलबार नै मुख्यसचिव बढुवा गरेको भए तामाङ मुख्यसचिव बन्नुहुनेथियो ।
