चितवन, २९ असार ।
चितवनको कालिखोला नजिकै चारकिलो भन्ने स्थानमा पहिरो खसेपछि अवरुद्ध मुग्लिन नारायणगढ सडकखण्ड अझै सुचारु हुन सकेको छैन । सडक सुचारु गराउनका लागि अहिले पहल भइरहेको जनाइएको छ ।
कालीखोलाको चारकिलो र सेती दोभानमा खसेको पहिरो पन्छाउने काम भइरहेकाले केहिबेरपछि सुचारु हुने सम्भावना रहेको चितवन प्रहरीले जनाएको छ । हिजो दिउँसो साढे तीन बजे उक्त स्थानमा सुख्खा पहिरो खसेपछि सडक अवरुद्ध बनेको थियो ।
उक्त सडकखण्डमा लामो जाम रहेको मध्यक्षेत्रिय ट्राफिक प्रहरी कार्यलयले जनाएको छ । सडक अवरुद्ध भएपछि नारायणगढबाट जाने तथा मुग्लिनतर्फबाट आउने सवारी बीचमै रोकिएका छन् ।
चार वटा मेसिन प्रयोग गरी पहिरो पन्छाउने काम भइरहेको चितवनका प्रहरी प्रमुख दीपक थापाले जानकारी भयो । पटक पटक पहिरो खस्ने हुँदा उक्त सडकखण्डमा सवारी जोखिम पनि बढ्दै गएको छ ।
मुग्लिन सडक विस्तारका क्रममा रहेकाले विभिन्न क्षेत्रको भित्तो काटिएका स्थानबाट सुक्खा पहिरो खस्नेक्रम जारी छ । गत जेठ यता मात्रै १ सय ३८ पटक पहिरो खसि अवरुद्ध भइसकेको छ ।
जोखिम बढेपछि त्यहाँका विभिन्न क्षेत्रमा उच्च सतर्कता अपनाइएको छ ।
