काठमाडौ २६ असार ।
सरकारले सप्तरीका बाढी प्रभावितलाई प्रति परिवार १५ लाख रुपैयाँ सहुलियत ऋण दिने निर्णय गरेको छ ।
आज बिहान बसेको मन्त्रीपरिषद बैठकले बाढी प्रभावितलाई प्रति परिवार १५ लाख रुपैयाँ सहुलियतपूर्ण ऋण र २५ हजार रुपैयाँ राहत उपलब्ध गराउने निर्णय गरेको हो ।
गत साता बाढी प्रभावित क्षेत्रको अवलोकनका क्रममा प्रधानमन्त्री शेरबहादुर देउवाले घोषणा गर्नुभए अनुसार सहुलियत रकम दिने मन्त्रीपरिषदले निर्णय गरेको हो ।
यस्तै बैठकले प्रतिनिधिसभा सदस्य निर्वाचन सम्बन्धी व्यवस्था गर्न बनेको विधेयकलाई व्यवस्थापिका संसदमा पेश गर्ने निर्णय पनि गरेको छ । प्रदेश सभा निर्वाचन सम्बन्धि विधेयक संसदमा पेश गर्नेबारे भने सरकारले केही निर्णय गरेको छैन ।
यस्तै प्रधानमन्त्री देउवाको परराष्ट्र सल्लाहकारमा डा. दिनेश भट्टराईलाई नियुक्त गर्ने निर्णय भएको छ । उहाँ यसअघि पनि प्रधानमन्त्रीको परराष्ट्र सल्लाहकारका रुपमा नियुक्त हुनुभएको थियो ।
