नवलपरासी, असार २३ ।
पूर्वरक्षा राज्यमन्त्री रामवचन अहिर र सांसद विक्रम खनालबीचको प्रमुख अतिथि बन्ने भन्ने बिबादका कारण नवलपरासीको सरावल गाउँपालिकामा नवनिर्वाचित पदाधिकारीको सपथग्रहण कार्यक्रम नै स्थगित भएको छ ।
शनिवार सरावल गाउँपालिकाको कार्यालयमा आयोजित सपथ ग्रहण कार्यक्रममा सांसद खनाललाई आयोजकले यसअघि नै प्रमुख अतिथि भनेर पत्र पठाएर निम्तो दिएका थिए ।तर अचानक दुबै जना एकैपटक आइपुगे ।
प्रमुखअतिथि भनेर नबोलाइए पनि सपथ कार्यक्रममा पुगेका अहिरले आफ्नो पार्टीले गाउँपालिका प्रमुख जितेकाले आफैंलाई प्रमुख अतिथि बनाउन दवाद दिए । प्रमुख अतिथिको विवादले शनिबार दिउँसो ३ बजे बोलाइएको सपथग्रहण कार्यक्रम हुन नसकेपछि साँझ पौने ६ बजे सम्मका लागि भन्दै स्थगित गरिएको छ ।
सरावल गाउँपालिका प्रमुखमा नेपाल लोकतान्त्रिक फोरमका राधेश्याम चौधरी र उपप्रमुखमा नेपाली कांग्रेसकी उत्तमा राय चुनिएकी छन् । कांग्रेस २ वटा वडामा, ४ वटा वडामा फोरम र एउटामा माओवादी केन्द्रले जितेको छ ।
निर्वाचन अधिकृतले सरकारी निर्देशन अनुसार सम्बन्धित क्षेत्रको सांसद बोलाउनु भनेकाले आफूहरुले सभासद विक्रम खनाललाई ४ दिनअघि नै प्रमुख अतिथि भनेर पत्राचार गरेर बोलाएको बताए ।
सपथग्रहण कार्यक्रममा निर्वाचन कार्यालयले नबोएपनि फोरम लोकतान्त्रिकका जिल्ला नेता तथा पूर्वरक्षा राज्यमन्त्री अहिर कार्यकर्ताको दलबलसहित सपथ कार्यक्रममा पुगेका थिए ।
गाउँपालिकाका प्रमुख राधेश्याम चौधरीले आफ्नै पार्टीका नेता प्रमुख अतिथि भएमात्र सपथ खाने अडान लिएपछि सपथ कार्यक्रम नै स्थगित गरिएको हो ।
