काठमाण्डौ ,असार २३ ।
व्यवस्थापिका संसदमा गत असार २० गते देखि जारी विनियोजन विधेयक, २०७४ माथिको छलफल शुक्रवारबाट सकिएको छ । छलफको अन्तिम दिन शुक्रवार आज विज्ञान तथा प्रविधि, शान्ति तथा पुनर्निर्माण मन्त्रालय, संस्कृति, पर्यटन तथा नागरिक उड्डयन, सहकारी तथा गरिवी निवारण, सामान्य प्रशासन, सिंचाई, सूचना तथा सञ्चार र स्वास्थ्य मन्त्रालय अन्तरगत विनियोजित बजेटमाथि छलफल भएको हो ।
यस्तै प्रधानमन्त्री तथा मन्त्रिपरिषद्को कार्यालय, राष्ट्रिय योजना आयोगको सचिवालय, राष्ट्रपतिको र उपराष्ट्रपतिको कार्यालयमाथिको विभिन्न खर्च शीर्षकमा पनि सांसदहरुले धारणा राखेका थिए ।
पहिलो दिन ६, दोस्रो दिन ७, तेस्रो दिन ९ र चौथो दिन आज ८ वटा मन्त्रालय तथा चार वटा निकायमाथि विनियोजित खर्च शीर्षकमा सांसदहरुले धारणा राखेका हुन् ।
छलफलका क्रममा उठेका प्रश्नको सम्बन्धित मन्त्रीले अगामी आईतबार र सोमबार जवाफ दिने समय निर्धारण गरिएको संसद सचिवालयले जनाएको छ । छलफलका क्रममा उठेका प्रश्नहरुको जवाफ दिइसके पछि आर्थिक वर्ष।२०७४–०७५ को पूर्ण बजेट पारितको प्रक्रिया सुरु हुनेछ ।
संसदको अर्को बैठक पर्सी आईतबार बिहान ११ बजेका लागि बोलाइएको छ ।
