काठमाडौ २३ असार ।
दोस्रो चरणमा निर्वाचन भएका ३ सय ३४ स्थानीय तहमध्ये हालसम्म ३ सय २४ स्थानीय तहको मतपरिणाम सार्वजनिक भएको छ । विराटनगर महानगरपालिकासहित बाँकी १० स्थानमा मतगणना जारी छ ।
मतपरिणाम सार्वजनिक भएका मध्ये नेकपा एमाले १ सय ४६ स्थानीय तहमा विजयी भएका छन् । कांग्रेसले १ सय १८ स्थानमा जीत हासिल गरेको छ भने नेकपा माओवादी केन्द्र ३८ स्थानमा विजयी भएका छन् । राप्रपाले ४ स्थानमा जीत हासिल गरेको छ ।
अन्य १८ स्थानमा विभिन्न साना दल तथा स्वतन्त्र उमेदवार विजयी भएका छन् । मतगणना जारी रहेका मध्ये ६ स्थानमा नेकपा एमालेको अग्रता छ भने २ स्थानमा कांग्रेस अघि देखिएको छ ।
एक स्थानमा माओवादी केन्द्रले अग्रता लिएको छ भने एकमा अन्य दलको अग्रता छ । पहिलो चरणको निर्वाचनमा जस्तै दोस्रो चरणमा पनि नेकपा एमाले नै पहिलो पार्टी बनेको छ । कांग्रेस दोस्रो तथा माओवादी केन्द्र तेस्रो स्थानमा छ ।
