बाँके, असार २२ । नेपाल तरुण दलका कार्यकर्ताहरुले कोहलपुर नगरपालिकाको मेयर पदमा नेपाली कांग्रेसका उम्मेदवार पराजित भएपछि क्षेत्रीय नेता युवराज पौडेलमाथि दुब्र्यवहार गर्दै कालोमासो दलेका छन् ।
तरुण दलका युवाहरुले नेपाली कांग्रेस क्षेत्र नं. १ का सदस्य युवराज पौडेलले पार्टीलाई अन्तरघात गरेको भन्दै उनीमाथि अभद्र व्यवहार गरेका हुन् । चुनाव सकिएपछि पौडेल कोहलपुर नगरपालिका–३, मदन चोकस्थित आफ्नै निवासमा बसिरहेको बेला विजय पुडासैनीको नेतृत्वमा रहेका केही युवाहरुले घरबाहिर बोलाएर कालो मोसो दलेर गएकाे जनाइएकाे छ ।
कांग्रेसका तर्फबाट मेयरका उम्मेदवार भानुभक्त भट्टराईलाई उनै पौडेलले हराएको भन्दै तरुण दलका युवाहरु आक्रोशित भएका थिए । साथै पौडेलले आफूमाथि दुव्र्यवहार भएको र अरुलाई पनि चेतावनी दिएको बताएका छन् ।
नेपाली कांग्रेस कोहलपुरका नगर सभापति बलराम शर्माले भने यस विषयमा आफूलाई कुनै जानकारी नभएको बताएका छन् । यहाँ कांग्रेसले मेयर पदमा हारे पनि उपमेयर पदमा भने जितेको छ । पौडेल आफैँ पनि मेयर पदका लागि सुरुमा दावेदार थिए । तर आफूले टिकट नपाएपछि आफ्नै पार्टीका मेयर उम्मेदवारलाई असहयोग गरेको स्थानीय नेताहरुको भनाइ छ ।
