इनरुवा, २० असार । सुनसरीको हरिनगरा गाउँपालिकाको अध्यक्षमा नेपाली काँग्रेस विजयी भएको छ ।
नेपाली काँग्रेसको तर्फबाट अध्यक्षमा उम्मेदवार भएका गफार अन्सारीले पाँच हजार ६६२ मत ल्याएर विजयी हुनु भएको हो । उहाँले सङ्घीय समाजवादी फोरमका हेमनारायण मेहतालाई दुई हजार २७ मतले पराजित गर्दै विजयी हुनुभएको हो । फोरमका मेहताले तीन हजार ६३५ मत प्राप्त गर्नुभएको छ ।
उपाध्यक्षमा पनि काँग्रेसकै रिमझिम भगत विजयी हुनुभएको छ । रिमझिमले पाँच हजार ९६ मत प्राप्त गरी विजयी हुनुभएको हो । उहाँले एमालेकी सुनितादेवी मेहतालाई दुई हजार १३१ मतान्तरले पराजित गर्दै विजयी हुनुभएको छ । मेहताले दुई हजार ९७५ मत प्राप्त गर्नुभएको छ ।
हरिनगरामा जम्मा सातवटा वडा रहेकामा १, २, ४, ७ नम्बर वडामा नेपाली काँग्रेस विजयी भएको छ भने ५ नम्बर वडा अध्यक्षमा एमाले र सदस्यमा नेपाली काँग्रेसका उम्मेदबार विजयी भएका छन् । त्यसैगरी, ३ नम्बर वडामा सङ्घीय समाजवादी फोरम विजयी भएको छ ।
