१८ असार,अछाम । मेल्लेख गाउँपालिकाको अध्यक्षमा पत्रकार लोकबहादुर बोहरा ‘ज्वाला’ निर्वाचित भएका छन् ।
माओवादी केन्द्र-काँग्रेस गठबन्धनका उम्मेदवार बोहराले नेकपा एमालेका डम्बर नेपालीलाई ५१६ मतले पराजित गरेका हुन् । बोहराले ४ हजार ५ सय ८ मत ल्याउँदा नेपालीले ३ हजार ९ सय ९२ मत ल्याए ।
यस्तै उपाअध्यक्षमा गठबन्धनबाट नेपाली काँग्रेसका धनबहादुर शाहाले ४ हजार ४ सय ८ मत ल्याएका छन् भने एमलेबाट उपाध्यक्ष पदका उमेद्वार समिता महर साउदले ४ हजार २ सय मत ल्याएकी छन् ।
शाहले महरलाई ४ सय ६ मतले पछि पार्दै उप प्रमुखमा बाजी मारेका हुन् ।
नवनिर्वाचित अध्यक्ष बोहरा जनयुद्धका युद्ध पत्रकार हुन् । उनले जनादेशबाट पत्रकारिता सुरु गरेका थिए । जनयुद्धको क्रममा जनादेशको पश्चिम संस्करणमा काम गरेका बोहरा हाल ‘हाम्रो मुक्ति यात्रा’ राष्ट्रिय मासिकका सम्पादक समेत छन् ।
त्यसैगरी बान्नीगढीमा काँग्रेस माओवादी गठबन्धन बिजयी काँग्रेसका राजेन्द्र वहादुर खड्का अध्यक्षमा २ हजार ७ सय ९३ मत ल्याएर विजयी भएका छन् ।
एमालेका कमल तिमेल्सेनाले २ हजार ३ सय १९ मत प्राप्त गरे । उपाध्यक्षमा गठबन्धनवाटै नेकपा माओवादी केन्द्रकै लोकेन्द्र साउदले २ हजार ४ सय ३६ प्राप्त गरी विजयी भएका छन् । उपाध्यक्षमा एमालेकी निर्मला रावलले २ हजार ३ सय ८१ मत ल्याएकी छन् ।
